Imminut toquttarneq pinaveersaartinniarlugu suliniut nersualaarneqarpoq

Suliniut Inuuneruna Iggoraarsuk inuup nammineq aallartitsineranik aallaaveqarpoq, Facebookilu aqqutigalugu sulissutigineqarpoq imminut toquttarnerup pinaveersaartinneqarnissaa. Peqqissutsimut Attaveqarnermullu Naalakkersuisup Steen Lyngep ullumi suliniuteqartut naapippai, taakkulu nersualaarneqarlutillu aamma checkimik 5.000 koruuninik nalilimmik tunissuteqarfigineqarput.

- Nuannaarlungalu tulluussutigisarpara inuit namminneq piumassuseqarnertik tunngavigalugu sammisamik paquminartinneqarluartumik imminnut toquttarnertut ittumik qitiutitsinermik pilersitsinermut peqataagaangata. Pinaveersaartitsineq iluatsilluassappat, inuit namminneq pisortallu suliniutini suleqatigiilluartariaqarput. Uanga assut soqutiginnillunga aallartinneqaqqammersoq malinnaaffigaara Facebookimi suliniut Inuuneruna Iggoraarsuk, Peqqissutsimut Attaveqarnermullu Naalakkersuisoq Steen Lynge oqarpoq nangillunilu:

- Uanga nunaannarutigaara suliniut Inuuneruna Iggoraarsuk innuttaasunit tapersersorneqarluarnera takusinnaallugu. Tassa quppernermi “likesinut” (nuannarinnittunut) tunngatillugu, kisianni aammattaaq assinnut ilanngunneqarsimasunut aamma inuit namminneq oqaluttuaannut ilanngunneqartunut tunngatillugu. Pitsaasumik iliuuseqarniartut tamarmik atorfissaqartinneqarput imminut toquttarnermik pinaveersaartitsinermut tunngatillugu, taamaattumillu suleqatigiit naapinnissaat kissaatigisimavara uangalu tapersersuinera takutikkusullugu.

Ulloq 10. septembari tassaavoq nunarsuaq tamakkerlugu imminut toquttarnermik pinaveersaartitsinermut ulloritinneqartoq.

Ulloq nunatsinni assigiinngitsunik aaqqissuussisoqarneratigut malunnartinneqarniarpoq.

Ukioq manna kommunit periarfissaqarsimapput ullumik malunnartitsinissaminnut Peqqissutsimut Attaveqarnermullu Naalakkersuisoqarfimmut tapiissutinik qinnuteqaateqarnissaminnut.

Nuummi suliniut Inuuneruna Iggoraarsuk ullumik malunnartitsiniarpoq.

Ilaatigut nunarsuaq tamakkerlugu imminut toquttarnermik pinaveersaartitsiniarluni iliuusissat pillugit oqallitsitsineq Nunatta Atuagaateqarfiani nal. 19.00 – 21.30 ingerlanneqarniarpoq, tassani Peqqissutsimut Attaveqarnermullu Naalakkersuisoqarfik peqataatitaqassalluni.


Paasissutissanik suli amerlanerusunik pissarsisoqassappat Peqqissutsimut Attaveqarnermullu Naalakkersuisoq Steen Lynge attaveqarfigineqarsinnaavoq allattaa Lea Holm telefon +299 55 33 03 imaluunniit email leah@nanoq.gl aqqutigalugu.