Tuttunniarnermi umimmanniarnermilu maleruagassat

Tuttunniarnermi, umimmanniarnermi il. il. maleruagassat atuuttut pillugit tusagassiorfinnut nalunaarut.

Tuttunniarnerup umimmanniarnerup aasaanerani ukiaaneranilu 2014-imi ingerlanneqarnera pillugu Namminersorlutik Oqartussat tuttut nujuartat illersugaanerat piniagaanerallu pillugit nalunaarutaat nr. 7, 27. juni 2013-imeersoq aamma umimmaat illersugaanerat piniagaanerallu pillugit nalunaarutaat nr. 8, 27. juni 2013-imeersoq malillugu maleruagassat atuuttut APNN-imiit matumuuna erseqqissaatigineqassapput.

 

  • Ukioq manna tuttunniarneq 1. augustimi 2014-imi aallartinneqarpoq tamannalu tusagassiorfinnut nalunaarummi 1. julimi 2014-imi nalunaarutigineqarluni akuersissummilu allaqqalluni. Sunngiffimmi tuttunniarneq 30. septemberimi unnuaq-qeqqanut unitsinneqassaaq inuussutissarsiutigalugulu tuttunniarneq 15. oktoberimi unnuaq-qeqqanut unitsinneqassalluni. Tuttunniarnissamut piffissaliussat avataanni tuttunik pisaqarneq inatsisinik unioqqutitsineruvoq tuttullu pillugit nalunaarummi § 25 malillugu akiliisitaanermik arsaarinnissummillu kiisalu piniarnermut allagartamik arsaarinnissummik kinguneqarsinnaalluni.   

 

  • Nuup Kangerluani umimmaat piniaqqusaanngillat taamaatumillu Nuup Kangerluani umimmannik pisaqarneq inatsisinik unioqqutitsineruvoq umimmaallu pillugit nalunaarummi § 26 malillugu akiliisitaanermik arsaarinnissummillu kiisalu piniarnermut allagartamik arsaarinnissummik kinguneqarsinnaalluni.

 

  • Nalunaarutini tamani § 12 malillugu tuttumik umimmammillu pisaqareernerup kingorna pisarineqartup neqaa tamaat pisaqarfimmiit nassarneqassaaq. Taamaattumillu timaannik allanillu nunaannarmi qimaannarnissaat inerteqqutaavoq unioqqutitsinerillu akiliisitaanermik arsaarinnissummillu kiisalu piniarnermut allagartamik arsaarinnissummik kinguneqarsinnaallutik.

 

  • Aqutsiveqarfimmi Nuummi savat nujuartat piniaqqusaanngillat taamaattumillu savanik nujuartanik pisaqarneq inatsisinik unioqqutitsineruvoq kommunillu savat nujuartanut uumasuusut eqqissisimatitaanerannut ileqqoreqqusaq malillugu akiliisitaanermik arsaarinnissummillu kinguneqarsinnaalluni.

 

 

 

 

 

Paasissutissat erseqqinnerusut immikkoortortaqarfimmi pisortamut Amalie Jessen-imut tlf. nr. +299 34 53 04, amalie@nanoq.gl, saaffiginninnikkut pissarsiarineqarsinnaapput.