Naalakkersuisut Siulittaasuat silap pissusaa pillugu New Yorkimut ataatsimeersuariassaaq

Naalagaaffiit Peqatigiit Allattaanerat Ban Ki-moon ulloq 23. September 2014 Naalakkersuisut Siulittaasuannik peqataaffigineqartumik New Yorkimi silap pissusaa pillugu ataatsimeersuartitsissaaq

Ataatsimeersuarneq silap pissusaa pillugu nunat tamalaat akornanni isumaqatigiinniarnissap maluginiaqquniarlugu Naalagaaffiit Peqatigiit ukiumoortumik ataatsimeersuarnerannut atatillugu ingerlanneqassaaq nunarsuarmilu gassinik toqunartulinnik aniatitsinermut killilersimaarinnissutaasinnaasunik iliuusissanut ilapittuutaassalluni. Illuatungeriit silap pissusaa pillugu isumaqatigiissummut tunngatillugu qaammatit tulliuttut 15-it piffissamut isornartoqarfiusumut iseriartuaassapput, taakkua nunanit tamanit peqataaffigineqartumik December 2015-imi Parisimi COP21-eqarneranut atatillugu nunarsuaq tamakkerlugu silap pissusaa pillugu nutaamik isumaqatigiissuteqartoqarnissaa naatsorsuutigineqarmat. 

Ataatsimeersuarnermi nunarsuarmi nunat siuttuisa arlallit nunarsuup kissakkiartorneranut pakkersimaarutaasinnaasunik nunarsuarmioqatigiinnut annertuunik iliuuseqarnissamik oqaaseqaateqarnissaat neriuutigineqarpoq.

Ukioq manna Naalagaaffiit Peqatigiit Allattaanerat Uummannamut Ilulissanullu tikeraarpoq. Uummannami piniartut Ban Ki-moonip isiminik takugamigit tassani uppernarsivaa, Nunatta qanimut silaannaap allanngorneranut atatillugu misilittagai tassaasinnaasut nunarsuarmi aqutsisunut maannakkut iliuuseqarnissamik suaaruteqarnertut paasineqarsinnaasut. Taamaattumik Naalakkersuisut Siulittaasuat ataatsimeersuarnermi oqalugiarnissaminut qaaqquneqarpoq.

Silap allanngornera pissutigalugu Issittumi innuttaasut misilittagaat takusartagaallu tassaapput ilisimatuussutsikkut paasissutissat ilisimatuunit nunarsuarmit tamaneersunit nalunaarsorneqartut. Issittumi silap pissusaata allanngornera Nunatsinni pinngortitamut annertoorjussuarmik sunniuteqarpoq, silallu pissusaata allanngornerata kingunerisai nunanut allanut naleqqiullugit sukkanerujussuarmik pipput.

Naalagaaffiit Peqatigiit Allattaanerata Uummannamut tikeraarnermini tusakkani misilittakkallu oqaluttuarineqartut nunarsuaq tamakkerlugu silap pissusaa pillugu isumaqatigiissuteqartariaqalernerup maannakkut pisariaqarneranik oqariartuuteqarnermigut atussavai.

Maluginiaqquneqarpoq, suliniutit Nunatsinni nukissiutinut, nukimmik atuilluarnissamut silamullu tunngassuteqartut VEK-mut aningaasaliissutit Pinngortitamut, Nukissiuteqarnermut Silalu pillugu Immikkoortortaqarfik Avatangiisinut Pinngortitamullu Naalakkersuisoqarfimmiittoq aqqutigalugit qinnutigineqarsinnaammata.

 

Inussiarnersumik inuulluaqqusillunga

Aleqa Hammond                      Kim Kielsen
Naalakkersuisut Siulittaasuat    Avatangiisinut Pinngortitamullu Naalakkersuisoq

 

Attavissaq:
Immikkoortortaqarfimmi pisortaagallartoq Pernille Møller
Toqq. +299 345154 / Mobil: +299532642
pmoe@nanoq.gl