Nunani Avannarlerni suleqatiigiinnermut ministerit ataatsimiittut

Nunani Avannarlerni suleqatigiinnermut ministerit ataatsimiipput. Nunani Avannarlerni suleqatiigiinnermut ministerit Københavnimi septembarip sisamaani ataatsimiipput. Nunat Avannarliit Siunnersuisooqatigiivisa oktobarimi Stockholmimi katersuunnissaannut ministerit siunnersuutissatik oqaluuseraat.

Nunani Avannarlerni suleqatiigiinnermut ministerit Københavnimi septembarip sisamaani ataatsimiipput.

Nunat Avannarliit Siunnersuisooqatigiivisa oktobarimi Stockholmimi katersuunnissaannut ministerit siunnersuutissatik oqaluuseraat.

Avatangiisinut, Pinngortitamut Nunanullu Avannarlernut Suleqatigiinnermut Naalakkersuisoq Kim Kielsen suleqatigiinnermut ministerit ataatsimiinneranni peqataavoq. Ataat-simiinneq aningaasaqarneq pillugu ministerit suliassaannik eqqartuiffiuvoq.

Ministerit 2015-imut missingersuutissatut siunnersuut aalajangiiffigaat, taanna ministerit siunnersuisooqatigiivisa siunnersuutaattut Nunat Avannarliit Siunnersuisooqatigiivinut ingerlatinneqassaaq.

Missingersuut katillugu 936 mio. DKK-nik annertussuseqarpoq. Ministerit Siunnersuisooqatigiivisa missingersuutaat ukiut marluk ingerlaneranni 68 mio. DKK-nik annikilleqarpoq, soorlu tamanna 2013-imi isumaqatigiissutigineqarsimasoq.

Issittup tungaanit isigalugu immikkut pingaaruteqarpoq, Nunani Avannarlerni Ministerit Siunnersuisooqatigiit issittumi apeqqutit pillugit suleqatigiinnissamut sammisassatut pilersaarutaat nutartigaq suleqatigiinnermut ministerit akuersissutigimmassuk.

Suleqatigiinnissami sammisassatut pilersaarut tamanna Nunat Avannarliit Siunnersuisooqatigiivini oqaluuserineqarnissaa siunertaralugu saqqummiunneqassaaq.

Tamanna pissaaq Nunat Avannarliit Siunnersuisooqatigiivisa tullissaanik Stockholmimi katersuunnissaanni oktobarip qaammataata naalernerani.

Issittoq pillugu Nunat Avannarliit suleqatigiinneranni sammisassatut pilersaarut Naalakkersuisunut annertuumik pingaaruteqarpoq, tassami tamanna ima isumaqarmat, Nunat Avannarliit ataatsimoornermikkut Issittumi Siunnersuisooqatigiit sulinerisa imarisaannut sunneeqataasarmata.

”Suleqatinnik ataatsimeeqateqarninni issittumi sammineqartut pillugit suleqatigiinnermi sammisassatut pilersaarutip nutarterneqarsimanera assut iluarisimaarlugu oqaatigaara”, Kim Kielsen oqaaseqarpoq.

”Nunanit Avannarliit issittumi suliniutinut tapiisarnerat amerlasuutigut tamakku pilersinneqarnerinut naammassineqarnerinullu pingaaruteqarluinnartarpoq. Issittumi uumassusillit assigiinngisitaarneri pillugit misissuinerup (Arctic biodiversity Assessment – ABA) ukioq manna naammassineqarnera assersuutissatut taasinnaavarput. Suliaq tamanna annertooq Issittumi Siunnersuisooqatigiit Flora og Fauna (CAFF) pillugit sammisaqartitaannit ingerlanneqarpoq. Isumaqarpunga tamanna pisinnaasimanavianngikkaluartoq Nunani Avannarlerni Ministerit Siunnersuisooqatigiivi suliniutip naammassineqarnissaata tungaanut aningaasatigut tapersiisimanngikkaluarpata”, Kim Kielsen naggasiivoq.

Paasissutissat: seniorrådgiver Jørgen S. Søndergaard, Nunanut Allanut Pisortaqarfik +45 40 34 31 23