Kim Kielsenip Nunat Avannarliit 2015 ataatsimiissutigai

Kim Kielsenip Nunani Avannarlerni 2015-imi suleqatigiinnissaq ataatsimiissutigaa. Nunani Avannarlerni 2015-imi suleqatigiinnissaq pillugu Nunanut Avannarlernut suleqateqarnermut Naalakkersuisup Kim Kielsenip danskit suleqatigiinnermut ministeriat Carsten Hansen oqaloqatigaa.

Suleqatigiinnermut ministerit Københavnimi sisamanngormat ataatsimiinnissaat sioqqullugu Kim Kielsenip aamma suleqatini danskiusoq ataatsimeeqatigaa.

Ataatsimiinnermi ilaatigut Nunani Avannarlerni Ministerit Siunnersuisooqatigiivisa ataatsimiinnissaat ilaatigullu danskit Nunani Avannarlerni 2015-imi suleqatigiinnermi siulittaasuutitaqarnissaannut pilersaarut oqaluuserineqarpoq.

“Danskit siulittaasuutitaqarnissaanni sammisassatut pilersaarutaat siulittaasuutitaqarnermi immikkut ittunik amerlasuunik suliniutissanittaaq imaqarpoq, tassannga suliniut ataaseq Kalaallit Nunaata Kangiata imartaani uumassusillit assigiinngisitaarneri pineqarput. Suliniut tamanna Pinngortitaleriffimmit aqunneqassaaq," Kim Kielsen oqarpoq.

“Siulittaasuutitaqarnermi sammisassatut pilersaarummut ilassutissatut ministerit isumaqatigiissutigaat Nunani Avannarlerni Ministerit Siunnersuisooqatigiivini suleqatitik issittumi suliniummut atugassanik aningaasanik qinnuiginiarlugit – issittumi suleqatigiinnermi sammisassatut pilersaarutip ataaniittumut – pinngortitaq, avatangiisit silallu pissusia pillugit atuisut ilisimasaannik katersinissamut tunngassuteqartoq, assersuutigalugu aalisarnermut, piniarnermut, tuttuuteqarnermut imaluunniit sukisaarsarfigalugu pinngortitamik atuinermut atatillugu. Nunat Avannarliit suleqatigiinnerat Naalakkersuisunut nalinginnaasumik pingaaruteqarpoq, kisiannili suliniutit aalajangersimasut aamma pineqaraangata,” Kim Kielsen oqaaseqarpoq.

”Aappaagu Danmark Nunani Avannarlerni Ministerit Siunnersuisooqatigiivini siulittaasuutitaqassaaq. Uanga Naalakkersuisunilu suleqatikka periarfissinneqarsimavugut sammisassatut pilersaarutissap imassaanut ilanngussaqarnissatsinnut. Taassuma naammassillugu inernera oktobarip naalernerani statsministerimit Nunat Avannarliit Siunnersuisooqatigiivinut saqqummiunneqassaaq. Tamanna ilutigalugu danskini suleqatigalu -suleqatigiinnermut ministeri Carsten Hansen – isumaqatigiippugut Nunani Avannarlerni Ministerit Siunnersuisooqatigiivini suleqativut qinnuiginiarlugit immikkut ittumik suliniummut aningaasaliinissaq pillugu."

“Suliniummi pineqartumi sammineqarpoq ulluinnarni atuisut pinngortitatsinnik ilisimasaannik aaqqissuussaanerusumik paasinninnerulernissaq siunertaralugu suleriaasissanik ineriartortitsinissaq. Taamaaliornikkut pinngortitami isumalluutinik atuineq pineqartillugu innuttaaqatigut annertunersumik naalakkersuinikkut sulinermi akuutinneqalissapput,” Kim Kielsen naggasiivoq.

Paasissutissat: seniorrådgiver Jørgen S. Søndergaard, Nunanut Allanut Pisortaqarfik +45 40 34 31 23