Kujataani angallannerup qanoq ittuunissaa suli aalajangerneqanngilaq

Kujataani ilaasunik assartuinerup imaatiguinnaq angallannikkut ingerlalertussaasutut tusagassiorfinnit arlalinnit oqariartuuteqarnerat ilumuunngilaq.

Naalakkersuisut pingaartippaat aningaasat atorlugit sapinngisaq tamaat angallassisoqarsinnaassasoq, sumiiffinnilu arlalinni angallanneq helikopterimik imaatigullu angallassinerit ataqatigiissillugit aaqqinneqarsinnaavoq.

Kiffartuussinissamut isumaqatigiissutissap isumaqatiginninniutigilinnginnerani ilaatigut Kommune Kujalleq oqaloqatigineqarpoq. Tassanngaanniit annertuumik kissaatigineqarpoq helikopterimik imaatigullu ataqatigiissillugit angallassisoqarsinnaanissaanut periarfissat misissorneqassasoq. Taamaammat suliakkiissutini allassimavoq Kujataani angallanneq helikopterimik imaatigullu angallassinerit ataqatigiissinneqarpata tamanna salliunneqassasoq.

Naalakkersuisunit aammaloorluni erseqqissaatigineqassaaq 2015-imit ilaasunik, allakkanik nassiussanillu angallassinermut kiffartuussinissamik isumaqatiginninniarnerit suli ingerlammata. Taamaammat Kujataani angallannerup qanoq ittuunissaanik  suli aalajangiisoqaranilu isumaqatigiittoqanngilaq.

Isumaqatiginninniarnerit piareerpata inernerusut Naalakkersuisunit kingornalu Aningaasaqarnermut Akileraartarnermullu Ataatsimiititaliamit akuersissutigeqqaarneqartussaapput. Aatsaat tamanna pereerpat kiffartuussisussat inaarutaasumik aatsaat isumaqatigiissuteqarfigineqassapput.

Kiffartuussinissamik isumaqatigiissutit siunertaraat nuna tamakkerlugu naleqquttumik akilimmik angalasoqarsinnaanissaata qulakkeernissaa. Kissaatigineqartut piviusunngortinniarlugit taamaammat periarfissat assigiinngitsut misissorneqartarput.

 

Paasisaqarnerorusuttut attavigisinnaavaat Steen Lynge Peqqissutsimut Attaveqarnermullu Naalakkersuisoq, Naalakkersuisumut allatsi Lea Hom aqqutigalugu, oqarasuaat 553303.