Peqqinnissaqarfiup Islandimik suleqateqarnini annertusarpaa

Pingasunngornermi ulloq 3. septembarimi peqqinnissaqarfik Islandimilu napparsimavissuaq, Landspítalið, suleqatigiinnermut isumaqatigiissuteqassapput kalaallit napparsimasut Islandimi katsorsarneqarnerat pillugu suleqatigiinnerup pitsaanerulersinnissaanik annertusinissaanillu siunertaqartumik.

Peqqissutsimut Attaveqarnermullu Naalakkersuisoq, Steen Lynge, aamma Islandimi peqqinnissamut ministeri, Kristján Þór Júlíusson, suleqatigiinnermut isumaqatigiissutip atsiorneqarnerani peqataassapput.

Isumaqatigiissuteqarneq suleqatigiinnermut isumaqatigiissummit pingaarnermit aallaaveqarpoq: "Nunani avannarlerni killerni peqqissutsimut ministerit akornanni suleqatigiinnissamut isumaqatigiissut" juuni 2014-imi atsiorneqartoq. 

- Suleqatigiinnissamut isumaqatigiissuteqarnermi Vestnordisk Rådimit aalajangersagaq erseqqissarlugu politikkikkut nunat avannarliit killiit peqqinnissaqarnikkut suleqatigiinnerulernissaat ingerlallualerpoq. Peqqissutsimut Attaveqarnermullu Naalakkersuisoq, Steen Lynge, oqarpoq nangillunilu: - Napparsimasunik Danmarkimukartitsisarnitsinnut allamik periarfissaqalerpugut, naatsorsuutigaaralu isumaqatigiissuteqarneq tamanna napparsimasuutitsinnut arlaqartunut iluaqutaajumaartoq.

Islandimi nakorsartinnermut aningaasartuutit Danmarkimisulli annertutiginissaat naatsorsuutigineqarpoq, angallanneqarnerli akikinnerussalluni angallanneqarnermullu piffissaq atorneqartoq sivikinnerussalluni.

Suleqatigiinnissamut isumaqatigiissuteqarnikkut pisortatigoortumik suleqatigiittoqalissaaq, tamatumuunatigut kalaallit napparsimasut Islandimi katsorsarneqarnissaannut periarfissat pitsaanerulersinneqarlutillu annertusineqassallutik.

Pilersaarutaavoq siunissami nappaatit aamma napparsimasut aalajangersimasut pillugit allanik isumaqatigiissuteqartoqarnissaa.

Peqqinnissaqarfiup naatsorsuutigaa allanik isumaqatigiissuteqarnermi siullermik napparsimasut sivikitsumik katsorsarneqartariaqartut pillugit isumaqatigiissuteqartoqarnissaa, soorlu assersuutigalugu tartumikkut ujarattaajartittussat.

Siunissami soorlu assersuutigalugu pilatsinnertalimmik, sivisuumik Reykjavikimiittariaqarnermik pisariaqartitsisumik, isumaqatigiissuteqartoqassappat kalaallit napparsimasut attaveqarfigisartagassaannik annertusaanissaq pisariaqarpoq.

 

Paasissutissanik suli amerlanerusunik pissarsisoqassappat Peqqissutsimut Attaveqarnermullu Naalakkersuisoq Steen Lynge attaveqarfigineqarsinnaavoq allatsia Lea Holm telefon +299 55 33 03 imaluunniit email leah@nanoq.gl aqqutigalugu.