Nunalerineq pillugu Siunnersuisoqatigiit ataatsimiipput

Nunalerineq pillugu Siunnersuisoqatigiit 34-saanik Narsami 28. august 2014 ataatsimiipput.

Siunnersuisoqatigiit ataatsimiinnerminni pingaarutilinnik eqqartukkaminni makku iluatsillugu avammut oqaaseqarfigerusuppaat:

Siullermik minnerunngitsumillu Nunalerineq pillugu Siunnersuisoqatigiit Nunalerineq pillugu Ataatsimiititaliarsuup siulittaasuata Palle Høy-ip isumaliutissiissummik suliaanut annertuumut sulisimaneranut qujaniarpoq.

Nunalerineq pillugu Siunnersuisoqatigiit isumaliutissiissummik saqqummiussiffigineqarput imaanillu eqqartuisoqarluni kiisalu makkua Naalakkersuisunut inassutigalugit:

- Nunalerineq pillugu Ataatsimiititaliarsuup isumaliutissiissutaanit inassuteqaatinik suliaqarnissamut suleqatigiissitamik pilersitsisoqassasoq aammalu suleqatigiissitaq makkuninnga aallartitaqartitsissasoq: SPS-imiit ilaasortaq ataaseq, Kommune Kujallermiit ilaasortaqa ataaseq, Nunalerinermut Siunnersorteqarfimmiit ilaasortaq ataaseq aamma Aalisarnermut, Piniarnermut Nunalerinermullu Naalakkersuisoqarfimmit ilaasortaq ataaseq kiisalu Aningaasaqarnermut Nunamullu Namminermut Naalakkersuisoqarfimmit ilaasortaq ataaseq.

Isumaliutissiissut tunngavigalugu suleqatigiissitaq suliassanik pingaarnersiunissamut allattorsimaffimmik makkuninnga imalimmik suliaqassaaq: a. inatsisinik nutarsaanissamut siunnersuutit, b. aningaasartuutikillisaanissamut suliniutissanik kiisalu c. nunalerinermik inuussutissarsiuteqarnermut aningaasaliissutissanik suliniutinik.

Nunalerineq pillugu Siunnersuisoqatigiit ilaasortaanniit siunnersuutit eqqartorneqartut tamarmik makku akuersissutigineqarput:

1. Savaateqarfinni akiligassat pisoqqat ajornartorsiutaassullu qaangernissaat siunertaralugu inatsisip allanngortinnissaanut suliamik aallartittoqarnissaannik siunnersuut.

Nunalerineq pillugu Siunnersuisoqatigiit tamarmik isumaqatigiissut akuersissutigaat pingaaruteqarluinnartoq malunnaatilimmik nunalerineq pillugu ESU-mut tunngasunik iluarsaassisoqarnissaa, taassumalu ataani ESU-mut akiitsut isumakkeerfigineqarnissaat aammalu ajornartorsiutit allat iluarsiissuteqarfigineqarnissaat suliniutaassasoq. Taamatut suliniuteqarnissaq pisariaqarpoq savaatillit amerlassusaat aammalu Neqi A/S-p neqileriffianut tunioraasut ikilisinneqassanngippata kiisalu savaateqarnermik inuussutissarsiutip nukittorsarneqarnissaa anguneqassappat.

2. ESU-mi taarsigassarsianit erniarititap 4%-mit 2%-mut appartinnissaannut siunnersuut.

Nunaateqarnermik inuussutissarsiuteqarnerup nukittorsarnissaanik suliniutip ikorfartornissaa anguniarlugu, Nunalerineq pillugu Siunnersuisoqatigiit inassuteqaat ESU-mi taarsigassarsianit erniarititap 4%-mit 2%-mut appartinnissaannut siunnersuut akueraat. Taamaaliornikkut savaatilik periarfissinneqassaaq maskiinanik illuutinullu nutaanik annertusaanissamut aningaasalersuinissaanut.

3. Savaateqarnermit nersussuaateqarnermut nuunnermi aallarterlaatut aaqqissuusiffigineqarnissaanik siunnersuut:

Nunalerineq pillugu Siunnersuisoqatigiit akueraat inassutigissallugu nersussuaatillit aallarterlaatut tapiissutit eqqarsaatigalugit savaatilittulli inissinneqartalernissaat. Taamaasiornikkut nersussuaatillit savaatilittulli inissinneqarnissaat aammalu nersussuaateqarnermut ikaarsaarnissamut piukkussarluarnissaq eqqanaarneqassalluni. Tunngavilersuutaasoq tassaavoq nammineq pilersornerulernissamut politikkimut nersussuaateqarneq tapertaalluarsinnaammat, tassa neqinik pissarsiat aammalu ineriartornissamut periarfissat Kujataani avannarpasinnerusunilu annertummata.

4. Savaaqqanik savanillu nakkutilliisoqalernissamut siunnersuut:

Savaaqqanik savanillu neriniartitsivinni tillinniartarnerit annertusiartornera pissutigalugu ilaasortat savanik savaaqqanillu Kommune Kujallermi nakkutilliisoqalernissaanik inassuteqaatitut siunnersuutip saqqummiunneqarnissaa akueraat. Ukiuni kingullerni paasineqarpoq savaaqqat aallaarsarisat naammattoortakkat tammartartullu amerliartuinnavissimasut, ilimagineqarlunilu tillinniartarnermik pissuteqartoq. Tamanna akuerineqarsinnaanngilaq aammalu savaatillit isertitassaraluannut kinguneqarnerluttarluni. Inatsisit malillugit nersutaatit, tassunga ilanngullugit savaaqqat savallu piniaqqusaanngillat.

5. Nunalerineq pillugu Siunnersuisoqatigiit suliassaqarfii aamma suleriaasissaat nutarterneqarput.

Aammattaaq Nunalerineq pillugu Siunnersuisoqatigiit suliassaqarfii aamma suleriaasaat pillugit oqaatsit aaqqissugaanermullu tunngasut nutarterneri Aalisarnermut, Piniarnermut Nunalerinermullu Naalakkersuisumut akuerisassanngorlugit inassutiginiarpaat.

Nunalerineq pillugu Siunnersuisoqatigiit sinnerlugit

Siulittaasoq 

Niels Lund

Email: nielslu@greennet.gl

Mobil: 492451