Aalisarnermut aningaasaliissutit allanngortissallugit siunnersuuteqarpoq

Naalakkersuisut 2015-imut Aningaasanut Inatsisissatut siunnersuutaat aggustimi saqqummiunneqarmalli ilaatigut aalisarnermut aningaasaliissutinut immikkoortitat pillugit siusinnerusukkut 20 mio. kr.-inut aningaasaliissutigineqarnissaanik immikkoortitsisoqarsimanerata allanngortinneqarsimanera tusagassiuutit aqqutigalugit annikinngitsumik oqallisigineqartarpoq.

Oqallisigineqartunut isummersuutigineqartartut assigiinngitsuusarput ilaatigullu pissutsinut piviusunut naapertuutinngitsutut taaneqarsinnaallutik.

Tamanna pillugu isumaqarpunga nassuiaateqartariaqarlunga suliamut Naalakkersuisuni isummernerput tunngavigalugu iliuuserineqartut erseqqissaateqarfigisariaqarakkit. Oqallinneq allaaserinninnerillu sulianut allanut atasunngortittarlugit saqqummiunneqartali-innarmata.

Eqqortoq unaavoq 2014-imi Aningaasanut Inatsimmi Inatsisartut akuersissutigisaanni ukiunut tulliuttunut aningaasaliissutissatut konto pingaarnermi 50.06.50-imut immikkoortinneqartussatut pilersaarutaasut 2015-imut illikartinneqarsimasut 20 mio. kr.-it. Taamatullu amerlatigisut 2016 aamma 2017-imi illikartinneqassasut.

Upernaaq manna Inatsisartut ataatsimiinneranni Naalakkersuisut peqquneqarput Inatsisartuni suliarineqartoq immikkoortoq 45 pillugu 2015-imut aningaasanik 15 mio. kr.-inik immikkoortitsisoqassasoq.

Immikkoortoq 45 tassaavoq Nunalerinerup iluani imminut pilersorneq siuarsarneqarsinnaaqqullugu 2015-imut aningaasanut inatsisissami 5 mio. kr.-inik immikkoortitsinissamik Naalakkersuisut sulissuteqaqqullugit Inatsisartut aalajagiiffigisassaattut siunnersuut, Inatsisartuni ilaasortap Aqqaluaq B. Egede, Inuit Ataqatigiit siunnersuutaa.

Immikkoortoq 45-ip Inatsisartuni aappassaanerlugu suliarinerani Aalisarnermut, Piniarnermut Nunalerinermullu ataatsimiititaliap isumaliutissiissutaa saqqummiunneqarpoq. Ataatsimiititaliaq isumaqatigiittoq allannguutissatut siunnersuummik saqqiummissaqarpoq, imaattumik:

“Kalaallit Nunaanni nunalerinerup tapersersorneqarnissaanut ineriartortinnissaanullu 2015-imut Aningaasanut Inatsisikkut minnerpaamik 15 mio. kr.-inik aningaasaliinissamut Naalakkersuisut peqquneqarnissaannik Inatsisartut aalajangiiffigisassaattut siunnersuut.”

Ataatsimiititaliap inassutigaa, allannguutissatut siunnersuut nunalerinermi atugassatut minnerpaamik 15 mio. kr.-inik aningaasartalik aningaasanut inatsisip isumaqatigiinniutiginissaanut Aningaasanut inatsimmi aningaasanik nikerartitsinikkut aningaasalersorneqassasoq.

Inatsisartut aalajangernerat tunngavigalugu Naalakkersuisut 2015-imut Aningaasanut Inatsimmut siunnersuutiminni aningaasanik nikerartitsinikkut aningaasaliiffigivaat.

Aningaasat nikerartinnerat nalilersuilluarnikkut pivoq. Matumani aningaasat immikkoortitat kontomi pingaarnermi 50.06.50-imit aaneqarnerat imatut tunngaveqarpoq.

Aningaasat Aalisarnermut aningaasaliissutinut immikkoortitat 2014-ip aallartinnerani tamakkerlugit 38,8 mio. Kr.-iupput.

Taakkunannga septembaarip pingajuat ilanngullugu aningaasat 2014-imi atorneqartut tamakkerlugit 11,1 mio. Kr.-it atorneqarsimapput.

Ukiullu sinneranut suliat maanna ingerlanneqartut aallaavigalugit suli 2,2 mio. Kr.-it missaanniittut naatsorsuutigineqarput atorneqassasut.

Taamaasilluni kontomi pingaar-nermi 50.06.50-imi 2015-ip aallartinnerani uninngasuutigineqartussat missangerneqarput 25,5 mio. Kr.-iussasut. 2014-imili suliat aningaasaliissuteqarfigissallugit akuerisaasut ilaat aatsaat akiliuteqarfigineqartussaapput naafferartumik suliat naammassisarneri najoqqutaralugit.

Erseqqissaatigineqassaaq Inatsisartut Ukiakkut ataatsimiinnissaanut Naalakkersuisut Aalisarnermut aningaasaliissutinut immikkoortitat pillugit Inatsisartut inatsisaata allanngortinnissaa pillugu siunnersuummik saqqummiussaqassammata.

Siunnersuut saqqummiunneqassaaq pissutigalugu naalakkersuinikkut kissaatigineqarsimammat, aalisartut aalisarsinnaanermut akuersissutitik pigiinnarsinnaassagat aalisariutitik isaterneqaraangata.

Taamatut kissaateqarnermut tunuliaqutaasoq unaavoq aalisartorpassuit kissaatigisannginnamikku angallatimik isaterneqarnissaat ilisimagamikku tapiissutinik akilerneqaraangamik piumasaqaatigineqartarmat aalisarsinnaanermut akuersissutit aamma pisassiissutit atorunnaarsinneqarnissaat.

Inussiarnersumik inuulluaqqusilluta

Finn Karlsen
Aalisarnermut, Piniarnermut Nunalerinermullu Naalakkersuisoq