Savaaqqat 10.000-nit amerlanerusut toqorarneqartalissapput

Aalisarnermut, Piniarnermut Nunalerinermullu Naalakkersuisoq, Finn Karlsen, Kommune Kujalliup nunalerineq pillugu isumasioqatigiititsinerani ammaalluni tallimanngormat, aggustip 29-anni oqarpoq Neqi A/S ilisimatitsisimasoq savaaqqat maannakkornit 10.000-nit amerlanerit toqorarneqartalissasut.

Neqi A/S Narsami ukioq kingulleq nutaarsuarmik toqoraavittaarpoq.

Neqi A/S-ip kalaallit savaaraat ukiumut 23.000-it toqoraavimmini toqoratarpai, neqaat assigiinngitsunngorlugit nunatta niuertarfiini annerusumik tuniniarneqartarlutik.

Toqoraavimmi savaaqqanik uumasunillu allanik ullumi suliarineqartartunit amerlanerujussuarnik tunisassiorsinnaalissaaq.

- Neqi A/S nalunaareerpoq ukiuni qanininnerni ullumikkut savaatillit, ilissi, tunisartakkassinniit savaaqqanik 10.000-inik amerlanerusunik pilersorneqalernissani naatsorsuutigereeraa, Finn Karlsen isumasioqataasunut ilaatigut oqarpoq.

Neqi A/S ukiup kaajallannerani amerlanngitsunik sulisoqartarpoq, toqoraanerup nalaani 100-it sinnerlugit sulisoqartarluni.

- Amerlanerusunik toqoraasoqartalerpat sulisunik aalajaatsunik piumasaqaatitaqalissasoq nalunngilara. Savaaqqat amerlanerit toqorarneqartalerpata nunatta inuussutissanik amerlanerusunik pilersornissaa taamaalilluni aamma eqqanaarneqassaaq, minnerunngitsumillu suliffissaqartitsiniarnermut tapertaallualissalluni, Naalakkersuisuni ilaasortaq isumasioqataasunut oqarpoq.

Annerusumik paasisaqarusuttut immikkoortortami pisortamut Amalie Jessenimut saaffiginnissinnaapput: amalie@nanoq.gl, tlf. + 299 55 33 42 eller 34 53 04