Kujataa Igasa Food Festivalerfiusoq

Narsami, Qaqortumi, Nanortalimmi, Alluitsup Paani aamma Tasilummi festivalit arfininngormat aggustip 30-annit aallartinneqarput, sapaammi septembarip arfineq aappaanni naggaserneqassallutik.

- Naalakkersuisooqatigullu isumaqatigiissuterput innersuutigalugu erseqqissassavara nunatta pissarititaanik atuinerunissaq atuilluarnissarlu pingaarteqigatsigu, Aalisarnermut, Piniarnermut Nunalerinermullu Naalakkersuisoq, Finn Karlsen, Kujataani Igasa Food Festivalit ammarlugit Narsami aggustip 30-anni oqalugiarpoq.

- Taamaattumik kommuneni allanilu nammineq iliuuserisat taamatut ittut assut anguniakkatsinnut tulluarput nuannerlutillu. Neriuppunga sineriatsinni siammarluarumaartut.

- Nunatsinni inuussutissanik peqqinnarnerpaanik, minguinnerpaanik mamarnerpaanillu peqarpoq. Issittup imaani nerisassaateqarfiusumi aalisakkat aamma qaleruallit pissusissamisoortumik nunarsuarmi tusaamasaapput. Aammalu uumasut miluumasut nunamiittut, soorlu umimmaat, savaaqqat, nersutit tuttullu pigaagut mamarluinnartut pitsaalluinnartullu tulluusimaarutigut, Finn Karlsen oqalugiarami ilaatigut oqarpoq, Finn Karlsen oqarpoq.

- Taakku pillugit nunat akornanni igasut siuttuusut mamartunillu nerisassiortartut usorisarpaatigut. Taakkununnga ilanngunneqassapput uumasut miluumasut imarmiut, timmissat, paarnat naatitat, innuttaasut untriitilippassuarni nerisaannut tunngaviusut.

- Minnerunngitsumik ukiuni makkunani Nunat Avannaamioqatigiit Nutaamik Nerisassioriaasiat, mamartunik nerisassiortartut akornanni nutaamik atorneqaleriartorfianni kalaallit nerisassaataat nunani arlalinni neriniartarfiit siuttuusut akornanni piumaneqarlualernikuupput, Naalakkersuisuni ilaasortaq oqarpoq.

- Inuussutissat taakku pitsaalluinnartut sooruna nammineq nunatsinni ilaat taamak pissarsiariuminaatsigisut? Sooruna tunisassiat peqqinnarluinnartut ukiut ingerlanerini inuussutissanit eqqunneqartunit amerlanertigut ajornerusumik pitsaassuseqartunik pisinniarfinni takussaanerutigisut? Nassuiaatit arlaliusinnaapput.

- Immaqa tamassumunnga pissutaasinnaapput inuulluataarneq, pisortat piumasaqaataannik ilisimasaqannginneq kiisalu tunisassiornerit annertuumik aningaasartorfiusut, tamakkulu pissutaallutik kalaallit inuussutissaataat niuerfinnut anngunniarneqartarneri ajornarnerusut. Immaqalu aaqqissuussinerit tusiattut naammannatillu?

- Siullermik peqqinnartunik nerisaqarnissaq tunngaviuvoq qullerpaamiitittariaqagarput. Kalaallit nerisassaataat ataatsimut isigalugit peqqinnartuupput, aammalu nerisavut nerisassiassallu najugaqarfitsinni pissarsiarisinnaasavut imminnut atapput. Tamakku annertunerungaartumik atorluartariaqarpavut.

- Aappassanik assersuutigalugu aalisartunut, piniartunut, nunaatilinnut tunisassiornermi tuniniaanermilu eqqortunik atugassaqalersitsinitsigut sumiiffinni aningaasarsiorfiusinnaasunik suliffissanillu pilersitsisoqarsinnaavoq.

- Naggataatigut nunami namminermi inuussutissanik tunisassiornerulernikkut eqqussukkat annikillisinneqarsinnaapput, taamaalilluni tamanna inuiaqatigiinnut aningaasatigut naleqartorujussuussaaq, Aalisarnermut, Piniarnermut Nunalerinermullu Naalakkersuisoq, Finn Karlsen oqarpoq.

Annerusumik paasisaqarusuttut immikkoortortami pisortamut Amalie Jessenimut saaffiginnissinnaapput: amalie@nanoq.gl, tlf. + 299 55 33 42 eller 34 53 04

Pisussat