Innarluutillit qitiutillugit

Innarluuteqarneq, timikkut tarnikkullu, inuunermi immikkut ittunik unammilligassaqartitsisarpoq. Unammilligassat taakku inuunermi pissutsinut amerlasuunut atasinnaasarput, tassunga ilanngullugu ilinniagaqarnissamik kissaateqarnermut. Tassunga atatillugu kommunit aamma Namminersorlutik Oqartussat akisussaaffeqarput, kinaluunniit innarluutilik pitsaanerpaamik pikkorinneruffeqalernissaminut periarfissaqarnissaa. Uani pingaartuuvoq innarluuteqartup pisortat suliaqarfiinut assigiinngitsunut akisussaaffimminnik allanut inissiiniartunut innersuunneqaqattaarneqarnermik misigisaqannginnissaa. Kommunit aamma Namminersorlutik Oqartussat – pisuni taamaattuni ilinniarfinnit sinniisuuffigineqarajuttartut – pineqartunut pitsaanerpaanik aaqqiissuteqarnissaq aallaavigalugu suleqatigiissapput. Allatut oqaatigalugu innarluutillit qitiutinneqassapput.

Innarluuteqartut assigiinngiiaarput. Assigiinngitsorpassuarnik pisariaqatitsisarput ilinniagaqarnissamillu kissaateqartarlutik. Taamaammat innarluutilinnut taamaallaat tunngatitanik ilinniarfinnik isumalluutit eqqarsaatigalugit pilersitsisoqarsinnaanngilaq. Tassunga taarsiullugu inuit ataasiakkaat pisariaqartitaat kissaataallu ilinniarfinni pioreersuni ilinniarnermik aaqqissuussinermut ilanngunneqartariaqarput, taamaalilluni innarluuteqartut ilinniaqatit sammisami assinginik soqutigisaqartut peqatigalugit ilinniagaqartariaqarput. Ilinniarneq ilinniarfinni pioreersuni ingerlanneqassaaq ingerlanneqarsinnaallunilu, taakkunani ilinniartut inaannik ilinniartitsinermilu ininik nutaanik sanaartornernut atatillugu innuttaasut innarluutillit ilinniarfitsinni tikilluaqquneqarnissaannut pisariaqartunik innarluuteqartut ullutsinnut naleqquttunik iserfissaqarnissaat ingerlavissaqarnissaallu Naalakkersuisut qulakkeerpaat.

Innarluutillit inuunerisa ilinniagaqarnerisalu pilersaarusiornerat inuit ataasiakkaat nakuuffii sanngiiffiilu aallaavigalugit pissaaq, aammali innuttaasut amerlassusaat isorartuumilu inoqarfeqarnera pissutigalugit neqeroorutit sullissinerillu sumiiffinni tamani neqeroorutigineqarsinnaanngitsut paasillugu. Inunnut ataasiakkaanut pissutsit pitsaanerpaat angunissaannut sumiiffimmiit sumiiffimmut nooriartaarsinnaaneq pisariaqarsinnaavoq, aammalu innarluutillit ilaqutaasalu ilisimasariaqarpaat inuusuttut illoqarfinni allani ilinniagaqarniarlutik angerlarsimaffimmiit aallartariaqartarnerattut tamanna illoqarfimmit/nunaqarfimmit najugarisamit allamut nuunnissamik kinguneqarsinnaasoq.

Assersuutigalugu ilinniartitsisut eqeersimaartut innaluutillillu ilinniagaqartut angusaqarluarusuttut inuit ataasiakkaat nakuuffii sanngiiffiilu aallavigalugit peqatigiillutik pitsaasunik angusaqartarput. Taamaammat pingaartumik piffissami aningaasatigut unammilligassaqarfiusumi aningaasat atugassarisat innarluuteqartunut ataasiakkaanut nunalu tamaat eqqarsaatigalugu annertunerpaamik nuannaarutaasumik atorneqarnissaat pingaaruteqarpoq.

Naalakkersuisut Inatsisartut 2015-imi upernaakkut ataatsimiinnissaannut innarluutilinnik suliaqartut ilinniarnerannut piginnaasanillu qaffassaanerannut periusissiamik iliuusissatullu pilersaarummik suliaqarnissamik imminnut pisussaaffilerput, tassanilu innarluutillit pitsaassusilimmik ilitsersorneqarneranni, ikiorneqarneranni paaqqutarinerannilu sulisunit ilinniarsimasunit sullinneqarnissaat qulakkeerneqassaaq.

Naalakkersuisut tamassuma saniatigut Kalaallit Nunatta innarluutilinnut siunissami ilinniagaqarnissamut inuussutissarsiuteqarnissammullu periarfissat neqeroorutaasinnaasut suunissaannik pilersaarusiornissaq kissaatigaat. Pilersaarutit taakku suliarineranni innarluutillit ataasiakkaat qitiutinneqarnissaannik anguniagaqarneq aallaaviussaaq, taakkulu eqqortutut isigineqassappat imikkoortumi inatsisini atuuttuni ilanngunniarneqassapput.



Paasissutissanik annertunerusunik pissarsioqarusukkuni Naalakkersuisumut allatsi Steen Jeppson telefonikkut 34 57 02 attavigineqarsinnaavoq.