Peerariittarnermik paasisitsiniaanerup inuusuttut eqqarsalersippai

Peerariilluni inooqateqarneq pillugu paasisitsiniaanerup inuusuttut eqqarsalersippai.

Inuusuttut tusindillit nunatsinni piviusuusaartitsilluni tv-kkut aallakaatitassiaq siulleq ”Aappariippugut!?” malinnaaffigisimavaat. Tamanna Ilaqutariinnermut Inatsisinillu Atuutsitsinermut Naalakkersuisoqarfiup DDB Copenhagenip allattoqarfia peqatigalugu suliarisimasaasa naliliinerup takutippaa.

”Aappariippugut!?” KNR-imi upernaakkut 2014-imi takutinneqarpoq. Paasisitsiniaanermi tv-kkut aallakaatitassiat piviusuusaartitat pingasuupput, taakkulu sammisassanik arlalinnik paasisitsiniaanerup Facebookimi nittartagaani ilaneqarsimapput. Paasisitsiniaanerup anguniagaraa peerariittut inuunerup isiginiarneqarnissaa aamma inuusuttut aappariittut inuunerini tatiginninnerup, misiginneqataanerup, ataqqinninnerullu nukittorsarneqarnissaa, tassani anguniagaalluni peerariinni persuttaasarnerup siaruarnissaata pinaveersaartinnissaa.

Facebookimi sammisaqarnerit aallakaatitassianilu malinnaasimanerit inuusuttut akornanni soqutigineqarsimaqisoq, naliliinerup takutippaa. Misissuinermi inuusuttut sisamaagaangata pingasut paasisitsiniaaneq assut nuannarisarsimavaat imaluunniit nuannarivissortarsimavaat, aamma amerlanerpaat isumaqarput, paasisitsiniaanermi oqariartuutit atorfissaqartitatik oqaluttuarineqartut. Pingaartumik inuusuttut tatiginninnerulernissaq aamma persuttaanertalinnik aporaannerit pinaveersaartinneqarnissaat pillugit oqariartuutit isumaqatigaat.

Isummanut pissusilersuutinullu tunngatillugu inuit quliugaangata arfinillit oqaatigaat, peeratsialaanissaq pillugu ilaatiguinnaq eqqarsaatigisarlugu, inuilli tallimaagaangata marluk aappariinnermi inooqatigiinneq pillugu annerusumik minnerusumilluunniit eqqarsaatigisarpaat. Inuit affaasa aallakaatitassiani aappariit tarrarsorfigisinnaasimavaat aamma inuit quliniit arfinillit aallakaatisassiani aappariittut inooqatigiinnermi sungiusagassat ilaat namminneq misilissimavaat. Tamassumalu takutippa, paasisitsiniaanermi sammisaq pillugu inuusuttorpassuit soqutiginnilersimanerat.

”Aappariippugut!?” pingaarnertut arnanut 30-it taakkuluunniit ataallugit ukiulinnut soqutiginarsagaavoq. Amerlasuut paasisitsiniaaneq pillugu peeqqaminnut ikinngutiminnullu oqaloqatigiissutigisimavaat, aamma taamaalilluni ”Aappariippugut!?” peerariilluni inooqateqarneq pillugu inuusuttumiit inuusuttumut pitsaasumik oqaloqatigiittarneq aallartissimavaa.



Facebook: www.facebook.com/aappariippugut

YouTube: www.youtube.com/aappariippugut



Paasisaqarnerujumagaanni uunga attaveqartoqarsinnaavoq:Torben Weyhe, Immikkut siunnersorti, Ilaqutariinnermut Inatsisinillu Atuutsitsinermut Naalakkersuisoqarfik, Oqarasuaat 34 66 43, E-mail: twey@nanoq.gl