Nunat avannarliit killiit suleqatigiinneq sammivaat

Reykjavikimi Nunat Avannarliit Killiit Nunatta Islandillu suletigiinnissaannik samminniffiusut pillugit ataatsimiinnerit.

Naalakkersuisut Siulittaasuata Aleqa Hammondip Islandip præsidentia Olafur Ragnar Grimsson arfininngornermi 30. august ataatsimeeqatigaa. Ataasinngornermi 1. september Naalakkersuisur Siulittaasuata Nunanut Allanut Ministeri Gunnar Bragi Svensson aamma savalimmiut lagmandiat peqatigalugit Nunani Avannarlerni Killerni Siunnersuisoqatigiit ukiumoortumik ataatsimiinneranni peqataavoq. Marlunngornermi 2. september Naalakkersuisut Siulittaasuat Hoyvikimi Siunnersuisoqatigiinni ataatsimiittuni savalimmiut lagmandiannit islandimiullu nunanut allanut ministeriannit qaaqquneqarluni alaatsinaattutut ataatsimeeqataavoq.

Ataatsimiinnerni pingasuni eqqartorneqartut tassaapput Islandimik suliassaqarfinni arlalinni suleqatigiinnerup annertusarneqarnissaata qitiutinneqarnera.

Aleqa Hammond ataatsimeereernerit kingorna ima oqarpoq:

”Nunat Avannarliit Killiit suli annertunerusumik aningaasaqarnikkut, niueqatigiinnikkut, aalisarnikkut kiisalu peqqinnissaqarfimmut tunngasutigut suleqatigiinnissaat pingaaruteqarpoq.

Nunani Avannarlerni Killerni suleqatigiinnermi periarfissarpassuaqarpoq, kisiannili taakkua iliuuseqarnikkut atuutilersinneqassapput. Islandip nunanut allanut miniteria Gunnar Bragi Sveinssonilu ataatsimeeqatigiinnitsinni islandimiut-kalaallillu ataatsimoorluta suleqatigiinnissamik isumaqatigiissuterput 2013-imeersoq Nunatta Islandillu akornanni suleqatigiissutigineqarsinnaasut innuttaasunut iluaqutaasinnaasut piviusumik iluaqutaasinnaasunut tunngaviusinnaasoq eqqartorparput.

 

Siullermik napparsimasut Nunatsinniit peqqissariartut suli amerlanerusut Islandimut peqqissariartalernissaat tunngavilerneqartariaqarpoq, ullumikkutuut Danmarkiinnangajammut peqqissariartarnermut naleqqiullugu, tamatumunngalu ilutigitillugu takornarissat amerlanersaasa Islandimut takornariartartut Nunatsinnut ingerlaqqittarnissaat sulissutigissavarput.

Nunani Avannarlerni Killerni angutit arnallu inuiaqatigiinni ineriartornermi naligiimmik atugassaqartinneqarlutik periarfissaqarnissaasa sulissutigineranni Nunarput Islandilu angusaqarsimaqaat. Siuariartornerit taama ittut Nunanut Avannarlernut Killernut tamarmut siaruarternissaat pingaaruteqarpoq.”

 

Inussiarnersumik inuulluaqqusillunga

Med venlig hilsen

 

Aleqa Hammond

 





Attavissaq:Nunanut Allanut Tunngasunut Pisortaq Kai Holst Andersen,Toqq/direkte +299 345151/+45 40178293, kaoa@nanoq.gl