Atuartut erinarsorlutik videolioqqusaasut

Atuaqatigiit tamarmiullutik sammisaqarnissaannut 10.000 koruuninik eqquigit. Kalaallit Nunaanni atuaqatigiinnut tamanut Avatangiisinut Pinngortitamullu Naalakkersuisoqarfik taamatut neqerooruteqarpoq.

Atuaqatigiit paasititsiniaanermi erinarsuut Qujanaq, Avatangiisinut Pinngortitamullu Naalakkersuisumit Kim Kielsenimit saqqummersinneqartoq aammalu Julie Berthelsenimit erinarsorneqartoq atorlugu takutitsillutik videoliussapput.

Erinarsuummi eqqaavimmik atuisut aammalu Kalaallit Nunaanni avatangiisinik pinngortitamillu paarseqataasut tamarmik qutsavigineqarput.

Qujanaq-p facebookikkut nittartagaatigut video

Unammititsinermut peqataaniaraanni ilinniartitsisup Qujanaq-p facebookikkut nittartagaanut, www.facebook.com/qujanaq link ikkutissavaa. Tassalu inuit videoliamik nuannarinninnissaat apeqqutaassaaq. Naliliisartunit videoliat nuannarineqarnerpaat akornanni 10.000 koruuninnalluni ajugaasoq toqqarneqassaaq.

Sapinngisamik amerlanerpaat peqataatinniarlugit videolianik ikkussinissamut piffissarititaasoq 22. septembarimut Namminersorlutik Oqartussanit sivitsorneqarpoq. Ajugaasoq septembarip naanerani saqqummiunneqassaaq.

Nuna tamakkerlugu meeqqat erinarsoqataasarput

- Erinarsuut Qujanaq nuannarineqarlualersimavoq, nalunngilaralu nuna tamakkerlugu meeqqat erinarsoqataasartut.

Aamma eqqaavimmik atuinissaq avatangiisinillu paarsinissaq tapersersoraat qularinngilara. Meeqqat tamanna pillugu filmiliaaraasa takunissaannut qilanaarpunga, Kim Kielsen, Pinngortitamut Avatangiisinullu Naalakkersuisoq oqarpoq.

Eqqaavimmik atuinissamik paasititsiniaaneq maajimi aallartinneqarpoq. Julie Berthelsen Maniitsumi Nuummilu atuartunit erinarsoqatigiinnik marlunnik erinarsoqateqarluni tusarnaartitsivoq. Taassuma malitsigisaanik nipilersorluni videoliaq arlaleriarluni tv-kkut takutinneqarpoq.

Malinnaasut 2000-it

Facebookikkut nittartagaq nuannarineqartorujussuuvoq. 2000-it malinnaaffigaat aammalu 7000-it sinnerlugit nipilersorluni videoliaq isiginnaarsimavaat. Tassani aamma erinarsuut Qujanaq oqarasuaammut sianertaatitut aaneqarsinnaavoq.

- Taamaattumik atuartut Qujanaq-mik videoliortut aammalu facebookikkut nittartakkamut ikkussisut isiginnaarterpassuaqassapput. Avatangiisitsinnik paarsinissamut allanut kaammattuineq tusaamasannguutigissallugu ajunngivippoq. Tamanna pillugu qujasariaqarpugut, Kim Kielsen oqarpoq.

Attavissaq:

Attaveqatigiinnermi suleqat
Bula Larsen
Tlf.: (+299) 345423
Tlf.: (+299) 593958