Aqutsiveqarfinnut killeqarfiit allanngorput

Stemningsbillede

Naalakkersuisut sapaatip akunnerata siuliani aalajangerpaat aqutsiveqarfik Upernaviup, aqutsiveqarfik Uummannap aamma Qeqertarsuup Tunuata killeqarfii allanngortinneqassasut. Allannguutit septembarip 14-ianni 2014 atuutilissapput.

Allannguinnermut atatillugu sinerissap qanittuani qaleralinniarneq pillugu Namminersorlutik Oqartussat nalunaarutaat tamatumani allanngortinneqarpoq, allannguutit pingaarnerit tallimat ukuulerlutik:

Aqutsiveqarfimmi Upernavimmi sumiiffinni marlunni killeqanngitsumik aalisartoqarsinnaalissasoq, ukunani: 71o30’N-ip avannaani aamma 72o30’N-ip kujataanni, kiisalu 73o52,5’N-ip avannaani aamma 75o00’N-ip kujataani.

Aqutsiveqarfik Uummannap killeqarfiata iluani killeqanngitsumik aalisartoqarsinnaalissasoq, 52°30’V-ip kitaani, maannakkut aqutsiveqarfiup killeqarfiisa iluanni.

Aqutsiveqarfik Qeqertarsuup Tunuani, 51°30’V-ip kitaani killeqanngitsumik aalisartoqarsinnaalissasoq.

Ilulissat kangerluanni sumiiffimmi, 51°00’V-ip kangiani killeqanngitsumik aalisartoqarsinnaassasoq, tamanna taamaallaat qimussimik pisanut assartorneqartunullu atuutissaaq.

Aqutsiveqarfiup Qeqertarsuup Tunua kujammut killinga 68° 00’N-imit 68° 52,5’N-imut allanngortinneqarpoq.

Aalisarnermut, Piniarnermut Nunalerinermullu Naalakkersuisoqarfik ilisimatitsivoq Qeqertarsuup Tunuata kujammut killeqarfia avannamut ilaneqartoq 68° 52,5’N-mut, tamatuma kujataani pisassiissutitaqanngitsumik aalisartoqalersinnaalluni.

Taamaalilluni aqutsiveqarfinni pioreersuni nutaanik aalisarfigineqalersinnaasunik pilersitsisoqarpoq, pisarineqartut pisassiissutinit siunissami ilanngaatigineqassaassallutik.

Killeqarfiit allanngorneri akuersissutaatilinnut sunniuteqassanngillat, soorlu aamma nutaanik akuersissutinik tunniussisoqassanngitsoq.

Inatsisartunut ilaasortaq Karl-Kristian Kruse Upernavimmi, Uummannami aamma Qeqertarsuup Tunuani aqutsiveqarfiit allanngortinneqarnissaannik aalajangiinissamut Inatsisartut upernaaq manna ataatsimiinneranni siunnersuuteqarpoq.

Siunnersuut tunngavilersorneqarpoq aalisarnermik sakkortuumik aqutsinerup kingunerisaanik qaleralinniarnerup ukiup ilaani unitsinneqartartoq, taamaammallu ingerlaavarnerusumik aalisartoqarsinnaaqqullugu iliuuseqarnissaq pisariaqartinneqarluni.

Siunnersuutigineqartoq tunngavigalugu Aalisarnermut, Piniarnermut Nunalerinermullu Naalakkersuisoqarfik aalajangigassatut suliaqarpoq, Naalakkersuisunit akuerineqarluni.

Paasisaqarnerorusuttut attavigisinnaavaat Aalisarnermut, Piniarnermut Nunalerinermullu Naalakkersuisoqarfimmi allaffimmi pisortaq, Jóhanna Lava Køtlum, email: jool@nanoq.gl, tlf: 345353.