Kiffartuussinissamut isumaqatigiissutissat suli isumaqatiginninniutigineqarput

KNR.gl qallunaatuuani allammat ”Air Greenlandip kujataani illoqarfiit akornanni helikopterimik angallassinermik kiffartuussinissamut isumaqatigiissutit annaasimagai” ilumuunngilaq.

Namminersorlutik Oqartussat erseqqissaassutigissavaat ilaasunik, allakkanik nassiussanillu angallassinermik kiffartuussinissamut isumaqatigiissutit 2015-imit atuutilersussat pillugit isumaqatigiinniarnerit suli ingerlammata. Taamaammat angallassinerup qanoq ittuussanera pillugu suli aalajangiisoqarnikuunanilu isumaqatigiissuteqartoqarnikuunngilaq.

Isumaqatigiinniarnerit naammassippata inernerat Naalakkersuisunit kingornalu Aningaasaqarnermut Akileraartarnermullu Ataatsimiititaliamit akuerineqaqqaartussaapput. Aatsaat tamanna anguneqarpat kiffartuussisussaq isumaqatigiissuteqarfigineqassaaq.