Suliffeqarfiit sulisartunik nunanit allaneersunik atuinerannik nakkutilliineq

Inuussutissarsiornermut, Aatsitassaqarnermut Suliffeqarnermullu Naalakkersuisoqarfik, Politiinik, Kommune Kujallermik, Akileraartarnermtu Aqutsisoqarfimmik aamma Danmarkimi Udlændingestyrelsemik suleqateqarlutik, Kommune Kujallermi suliffeqarfiit sulisartunik nunanit allanit tikisitanik sulisartoqartarnerinut marlunngornermi augustip 27-anni nakkutilliipput. Nakkutilliinermi takornarialerisut, neriniartarfiit aamma unnuisarfiit pulaarneqarput.

Sulisartut nunanit allanit tikisitat arlalialunnguit sulinermut najugaqarnissamullu akuersissutinik pigisaqarnersut paasiniarlugu nakkutilliivigineqarput.

Amerlanerpaat inatsisit naapertorlugit piffissamik killilikkamik sulisinnaanermut najugaqarsinnaanermullu akuersissutinik pigisaqarput, allat akuersissutinik nutaanik pissarsinissartik siunertaralugu qinnuteqaqqittuupput aamma piffissamik killilingaanngitsumik nunatsinni najugaqarnissamut akuersissummik pigisaqartoqarluni.

Ikitsuinnaat sulisinnaanermut najugaqarnissamullu akuersissutinik pigisaqanngillat, taakkualu pisortanit maanna iliuuseqarfigineqaleruttorput.

Taamatut nakkutilliinermi paasisat sinerissami Nuummilu nakkutilliisimanernut assigupput.

Nunanit allanit tikisitatut sulisartut inatsisit naapertorlugit sulisinnaanermu najugaqarnissamullu akuersissutinik pigisaqartarput, ikitsuinnaallu Kalaallit Nunaanni inatsisinik unioqqutitsillutik sulisarlutik.

Oqartussat assigiinngitsut suleqatigiilluarnerisigut nakkutilliinermik sulineq eqaallisarneqarpoq, piginnaaneqarfiillu siunissami sumut atorneqassanersut eqqumaffigineqarpoq.

Sulisartunik nunanit allaneersunik annertunerusumik nakkutilliisarneq suli soqutigiuassuarput.

Annerusumik paasisaqarusukkaanni attavissaq:
Janus Chemnitz Kleist,Inuussutissarsiornermut, Aatsitassaqarnermut Suliffeqarnermullu Naalakkersuisoqarfimmi atorfilittaq: +299 34 54 07