Pinngortitamiitillutit eqqaavissat nassartaruk!

Pinngortitamut angalaleraangavit puussiamik eqqaavissamik eqqaamasarit!

Inuusuttut tunniusimalluartut katillugit 100-t, Nuummi Piareersarfimmeersut ulluni pingasuni kingullerni Quassussuaq kaajallallugu Nuummilu pinngortitami saliisimapput.

Avatangiisinut Pinngortitamullu Naalakkersuisup, Kim Kielsenip, aaqqissuussineq nuannarilluarpaa, oqarlunilu: 

- Nuannaarutigaara Piareersarfimmit sapaatit akunnerat ilisarititsiviusoq avatangiisitsinnik pinngortitamillu aallussinissamut atormassuk, aammalu ilinniartut tamarmik tunniusimalluarlutik suliaq suliarimmassuk. Tamatta pinngortitamut angalaarnialeraangatta tamatigut puussianik eqqaavissanik marlussunnik nassartarutta, imaluunniit eqqakkanik qimaannakkanik angerlaassisarutta, ataatsimoorluta angusaqarluartussaavugut. Allornerit mikisunnguit atorlugit annertuumik pitsannguisinnaavugut. Tamatuma saniatigut nuannaarutigaara, ilinniarfiup ilinniartullu saliinerminni Qujanaq-mut atortugut atormatigit. Avatangiisitta eqqiluinnerulernissaannik qaammarsaanitsinnut tapersersuineq ilisimasaqarnerlu tamatumani takutinneqarpoq.

Saliineq Piareersarfimmi sapaatit akunnerata ilisarititsiviusup ilagaa, tassanilu pinngortitami eqqakkat aallunneqarput. Inuusuttut tamarmik puussianik eqqaavissanik tunineqarput, taamaalillunilu katersuinersuaq aallartinneqarpoq. Assit, eqqakkat ullut ingerlanerini katersorneqartut qanoq amerlatiginerinik takutitsiviusut uani takusinnaavatit.

 

Assit takukkit.

 

Attavissaq: Lea Juul Levisen, Avatangiisinut Pinngortitamullu Naalakkersuisoqarfik. Toqq/direkte 346706, email:lejl@nanoq.gl