AG-mi allaaserisamut ”Kuupik piukkunneqanngilaq” naqqiissuteqarneq

AG-mi allaaserineqartoq ”Kuupik piukkunneqanngilaq” tunngavigalugu naqqiissuteqarneq.

Allattoq Pisortaaneq Svend Hardenberg

Naqqiissuteqarneq ilanngutassiami arlalinnik pissusiviusuni tunngaviusunilu kukkuneqarnera tunngavigalugu nassiunneqarpoq.

Aallarniutigalugu Christian Schultz-Lorentzen allappoq, ”atorfinitsitsinissamut ataatsimiititaliami tallimanik ilaasortaqartumi ikinnerussuteqartut atorfinitsitsinissamut akerliusut. Pingaarnertut tunngavilersuutaasoq tassaasimavoq Aviâja Helms-ip piumasaqaatit Namminersorlutik Oqartussat namminneerlutik atorfimmut allagarsiissutaanni tunngavissarititaasutut piumasaqaatigineqartut naammassisimanngikkai,”.

Siullermik oqaatigineqassaaq Atorfinitsitsinissamut ataatsimiititaliap aallarniutigalugu Aviâja Helms piukkunnartutut nalilersimammassuk, tassami oqaloqatigineqartussatut aggersarneqarpoq, tamatumalu kingorna atorfimmi atorfininnissamik neqeroorfigineqarluni.

Aamma ataatsimiititaliami arlaannaalluunniit atorfininnissamik neqeroorfigineqarnissaa pillugu aalajangiinermut akerlilersuinngilaq, tamatumunnga taamaallaat aviisiliortup tungaaniit isumaliutersuuteqarneq aallaaviuvoq.

”Atorfinitsitsinissamut ataatsimiititaliami ikinnerussuteqartut toqqaanermut isumaqataanngillat”, aamma aviisiliortup tungaaniit isumaliutersuuteqarnermik aallaaveqarpoq, tassami amerlanerussuteqartut qinnuteqartumik ataatsimik piumanninnerunerat, inuk pineqartoq taanna pillugu ataatsimiititaliami isumaqatigiinnginnertut taaneqarsinnaanngilluinnarpoq.

”Piumasaqaatinik qinnuteqartut allat naammassinnissimanissaat ilimanarpoq” atorfimmut allagarsiussami kissaataasunut tunngasoq, aamma isumaliutersuuteqarnermut takussutissaassasoq ilimanarpoq, tassami aviisiliortoq arlaatigulluunniit Atorfinitsitsinissamut ataatsimiititaliami suliap ingerlanerani peqataanngimmat.

”Tusagassiuutitigut nalunaarummi nassuerutigineqarpoq …, Atorfinitsitsinissamut ataatsimiititaliami isumaqatigiittoqarsimanngitsoq, isumaqatigiissutaasorli sumorpiaq tunngassuteqarsimanersoq eqqoqqissaartumik nassuiarneqarani.”

Tamanna aamma aviisiliortup tungaaniit isumaliutersuuteqarsimanermut takussutissaavoq, tassami ataatsimiititaliami isumaqatigiinngittoqanngilaq.

Taamaallaat qinnuteqartumut ataatsimut amerlanerussuteqartut tapersersuipput, tamannalu ataatsimiititaliami siulittaasup tusaatissatut tiguaa, tamatumalu kingorna aalajangiilluni.

”Ataatsimiititaliami tassa isumaqatigiittoqanngilaq, tassani ikinnerussuteqartut eqqartuussissuserisup, taamaalillunilu inuup atorfimmi inuttassarsiuilluni allagarsiussami piumasaqaatinik naammassinninngitsup aammalu qullersatut atorfiup pisariusup atorfiginissaanut pisariaqartunik piginnaasaqanngitsup atorfinitsinneqarnissaanut aterminnik atuisitseqqugatik.”

Aviisiliortup tungaaniik isumaliutersuutit maannakkut imaalerput qinnuteqartumik pineqartumik atorfinitsitsinermut tunuliaqutaarusunngitsoqartoq, tamannalu eqqunngilaq.

Tassunga atatillugu siusinnerusukkut naqqiissummi ilisimatitsissutigaara, atorfinitsitsinissamut ataatsimiititaliami siulittaasoq inaarutaasumik aalajangiisussaasoq, tamannalu aamma suliami matumani pivoq. Aammalu qinnuteqartumik ataatsimik atorfinitsitserusuttut amerlanerussuteqartut isumaqatigiinngittoqarneranut, imalluunniit” aterminnik atuisitserusunnginnermut” takkussutissaanngitsoq.

”Svend Hardenberg erseqqissaavoq atorfinitsitsinissamut ataatsimiititaliaq – pisariaqarpallu siulittaasoq kisimi – atorfinitsitsinissaq pillugu aalajangiissasoq …”.

Aviisiliortoq pissusiviusunut isummersunngilaq, soorlu tamanna siusinnerusukkut naqqiissuteqarnermi aamma takuneqarsinnaasoq, tassani kaajallaasitaq pineqartoq naapertorlugu atorfinitsitsinissamut ataatsimiititaliami siulittaasoq kisimi aalajangiisussaammat. Atorfinitsitsinissamut ataatsimiititaliap taamaallaat Siulittaasumut suliap ingerlanerani ikiuunnissaq suliassaraa.

”Svend Hardenberg AG-imit sapaatip akunnerata naanerani attaveqarfigineqarami oqaraluarpoq atorfinitsitsinissaq naggataatigut politikkikkut aalajangiiffigineqartussaasoq.” eqqunngilaq.

Kingullermik Christian Schultz-Lorentzen attaveqarfigaara sisamanngorneq ulloq 21. august, nal. 16:45 sianerfigigakku, aammalu 7 minutsini oqaloqatigalugu.

Tamanna siusinnerusukkut naqqiissuteqarnermi eqqaaneqareerpoq, tassani taamaallaat oqaluuseraarput Aallartitaqarfimmi sulisunut paasissutissiissutissakka pissarsiariniarsarigai. Taamaattumik paasissutissiisimasunga ”naggataatigut politikkikkut aalajangiiffigineqartussaasoq” kukkusumik issuaavoq.

Taamaattoqanngilaq, aammalu siusinnerusukkut naqqiissuteqarninni ilisimatitsissutigisattuulli ulloq 20. august 2014 ilisimatitsissut Naalakkersuisunut saqqummiunneqarpoq, tamannalu aamma tusaatissatut tiguneqarluni.

”…aamma Aleqa Hammond-ip sapaatip akunnerata naalernerani uppernarsarpaa sinniisoqarfimmi pisortamik atorfinitsitsineq aatsaat Naalakkersuisuni suliarineqartussaasoq”.

Tamanna aamma eqqunngilaq, tassami Naalakkersuisut Siulittaasuata Aleqa Hammondip aviisiliortumut ilisimatitsissutigaa sulisunut ataasiakkaanut suliani oqaaseqartarani, kisianni Naalakkersuisut atorfinitsitsinerit pillugit soorunami ingerlaavartumik ilisimatinneqartartut. Taamaattumik aviisiliortup allanneratut Naalakkersuisunit suliarineqarsimasinnaanngilaq, tassami tamanna taamaallaat tusaatissatut tiguneqarpoq.

Naggasiutigalugu aviisiliortup ilisimatitsissutigaa ataani atsiortunga attaveqarfiginiartaraluaraminga iluatsissimanngitsoq, tamanna eqqumiiginarsinnaavoq, tassami siusinnerusukkut ilisimatitsissutigaara mail-ikkut apeqquteqarluni il.il. attaveqarfigisinnaagaanga, tamannalu pisimanngilaq.

Attaveqarfissaq: Svend Hardenberg, Naalakkersuisut Siulittaasuata Naalakkersuisoqarfiani pisortaaneq, mail: svha@nanoq.gl