Isumaqatigiissut nutarterneqarpoq

Kalaallit Nunaata Danmarkillu aatsitassanut suliassaqarfimmi avatangiisit pillugit siunnersorneqartarnissaq pillugu suleqatigiinnissamut isumaqatigiissut nutarterpaat.

Avatangiisinut Pinngortitamullu Naalakkersuisup Kim Kielsenip aamma danskit Ilinniartitaanermut Ilisimatusarnermullu Ministeriata Sofie Carsten Nielsenip ullumi atsioqatigiinnermikkut aatsitassanut suliassaqarfimmi avatangiisit pillugit siunnersorneqartarnissaq pillugu isumaqatigiissut nutarterpaat. Suleqatigiinnissamut isumaqatigiissummi illuatungeriit National Center Energi og Miljø-p (DCE) aatsitassanut suliassaqarfimmi avatangiisit pillugit ilisimatusarnikkut siunnersuinermik ikiuuttarnerata ingerlaqqinnissaa aalajangersarneqarpoq.

Naalakkersuisoq Kim Kielsen oqarpoq: ”Ullumikkut isumaqatigiissut, suleqatigiinnerup ingerlaqqinnissaanut isumaqatigiissuteqarfigisarput atsiorsinnaagatsigu nuannaarutigaara. DCE-p aatsitassanut suliassaqarfimmi avatangiisinik innarlitsaaliuinissaq pillugu, siunissami Pinngortitaleriffik qaninnerusumik suleqatigalugu, ilisimatusarnikkut siunnersuisarnerminik ingerlatitseqqissinnaanera nuannaarutigaara”.

DCE-p suliassaqarfinni immikkut ittuni, Kalaallit Nunaata ilisimatusarnikkut nukittunerusumik siunnersorneqarnissamik pisariaqartitsivigisaanni, Danmarkimit ikiorsiivigineqarnikkut pitsaanerpaamik naammassineqarsinnaasumik, ineriartortitsinissaa immikkullu ilisimasaqalernissaa isumaqatigiissummi ammaanneqarpoq. Tamatuma peqatigisaanik Pinngortitalerivimmi immikkoortortaq nutaaq, aammattaaq aatsitassanut suliassaqarfimmi avatangiisinik innarlitsaaliuinermut ilisimatusarnikkut siunnersuisarnermik ilisimatusarnermillu immikkut suliaqarfiusoq ineriartortinneqaleruttorpoq.

Naalakkersuisoq Kim Kielsen oqarpoq: ”Piumasaqaatinik eqqortunik saqqummiussisinnaanissarput qulakkeertuassavarput. Maani nunatsinni piginnaaneqarfinnik ineriartortitsinitsigut, tamatumalu peqatigisaanik DCE-mi suliassani pingaaruteqarnerpaasuni ineriartortitsisoqarneratigut immikkullu piginnaanngorsartoqarneratigut tamanna pissaaq. Suleqatigiinnerup pitsaasup qanimullu suleqatigiiffiusup, DCE-p Pinngortitaleriffiullu, aammalu Kalaallit Nunaanni aatsitassanut oqartussaasut akornanni atuuttuarsimasup ingerlateqqinneratigut tamanna angusinnaavarput”.








Annertunerusumik paasisaqarusunnermi attaveqarfissaq:


Naalakkersuisup allattaa Karen Motzfeldt


Mobil (+299) 562450


Email: karm@nanoq.gl