Tusagassiivimmut SermitsiaqAG-mut tapiissutit Pillugit

Namminersorlutik Oqartussat inatsisinik atuutsitsisussaatitaaneq inatsisiliortussaatitaanerlu suliassaqarfittut tigunikuuaat. Tamatumunnga naapertuuttumik atatillugu inatsisiliortussaatitaanermik akisussaaffeqarneq Inatsisartuniippoq. Inatsisartut ombudsmandiata inatsisinik atuutsitsisussaatitaasut Naalakkersuisuniittoq nakkutilliineq ingerlataraa. Kiisalu eqqartuussisussaatitaaneq eqqartuussiveqarfimmiilluni.

”Naalakkersuisut ulloq 9. juli 2014 Tusagassiivik SermitsiaqAG tusagassiorfinnut tapiissutinik qinnuteqaataa itigartippaat. Aalajangiineq tamakkiisumik eqqortuuvoq, inaarutaasuulluni, aammalu allaffissornikkut oqartussaasunut allanut maalaarutigineqarsinnaanani”, taamatut Naalakkersuisut Siulittaasuat, Aleqa Hammond oqarpoq.

”Naalakkersuisut erseqqissassavaat aalajangiinermi oqaaseqarnissamut kiffaanngissuseqarneq imaluunniit oqartussaaqatigiinneq killilersorneqanngimmat – paarlattuaniinneruvoq, tamatuma arlaannaannulluunniit attuumassuteqannginnerulerneq annertunerulersippaa. Erseqqissaatigineqassaaq Aningaasanut inatsimmi sinaakkutissat Naalakkersuisut aalajangiineranni malinneqarmata. Suliffeqarfik nammineerluni ingerlalluarsinnaappat, sinneqartooruteqartumik ingerlatsisunut Naalakkersuisut innuttaasut akileraartartut aningaasaataannik annertunerusumik tunniussinianngillat”.

”Tusagassiivik SermitsiaqAG suliassamik nalilersuititsilluni misiliinissamut periarfissaqarpoq, ilanngullugu Naalakkersuisut aalajangiinerat ombudsmandimut aamma /imaluunniit eqqartuussivinnut suliakkiissutigineratigut. Tamanna Naalakkersuisut eqqissillutik qilanaaraat” ilassuteqarpoq Aleqa Hammond aammalu naggasiutigalugu:

”Inatsisilerinikkut immikkut ilisimasallit suliami illuatungiliuttut aappaannaanniit apeqqutinut arlalinnut akissuteqarput. Taamaattumik naliliinerat ataqqilluinnarlugu Naalakkersuisut aalajangiinermut allanngortitsinnissamut pissutissaqanngillat”.


Saaffissaq:

Naalakkersuisut Siulittaasuata Naalakkersuisoqarfia
Pisortaq Mininnguaq Kleist
Email: mikl@nanoq.gl
Oq.: +299 345132