AG’p allaatigisaanut ”Pisortaaneq nutaaq assortuussutigaat”-nut naqqiut


Christian Schultz-Lorentzenip allaatigisaani kukkunerit piviusut arlallit naqqiummi tunngavigineqarput.

Siullermik, atorfinitsitsinermut ataatsimiititaliami AG’mi allaaserineqartutut

 Assortuuttoqarnikuunngilaq imaluunniit isumaqatigiinngitsoqartorujussuulluni.

Aamma atorfinitsitsinermut ataatsimiititaliaq Naalakkersuisut Siulittaasuannut (imaluunniit Naalakkersuisuni ilaasortanut tamanut) inassuteqartussaanngilaq – aalajangerneq atorfinitsitsinermut ataatsimiititaliami aalajangerneqartussaavoq.

Aamma imaanngilaq, Aviâja Helmsip allaatigisaq naapertorlugu, atorfimmut piukkunnaateqanngitsoq – Aviâja Helms piukkunnaateqarpoq, taamaassimanngitsuuppat aalajangertoqarsimanavianngikkaluarpoq.

Aamma allaaserineqartutut eqqunngilaq, atorfinitsitaaneq Namminersorlutik Oqartussat intranetianni ”Nanuaraq”-mi eqqaaneqarsimasoq.

Paatsoorsimaneq tusagassiortup allaatigisamini tunngavigisaa suliallu pineqartup kukkusumik isigineqalerneranik kinguneqartoq naqqiissuteqarfiginarlugu, qanoq pisoqarsimaneranik erseqqissaassuteqarnissaq pisariaqarpoq.

Sulisussarsiornermi qinnuteqaatit kingusinnerpaamik nassiunneqarnissaat ulloq 23. juli 2014-imut killilerneqarsimavoq. Naalakkersuisut Siulittaasuata Naalakkersuisoqarfiata Kalaallit Nunaanni Namminersorlutik Oqartussat Qitiusumik Allattoqarfianni qaammammusialinnik atorfinitsitsinermut atatillugu sulisunik akulerutsitsinissaq pillugu kaajallaasitaq 1. juni 2010-meersoq naapertorlugu atorfimmut pineqartumut qinnuteartunik nalilersuinissaq siunertaralugu atorfinitsitsinermut ataatsimiititaliaq pilersippaa.

Atorfinitsitsinermut ataatsimiititaliaq tallimanik ilaasortaqarpoq kaajallaasitarlu naapertorlugu pisortaq sulisunut akisussaasuusoq (Naalakkersuisut Siulittaasuata Naalakkersuisoqarfiani Naalakkersuisoqarfimmi Pisortaq) atorfinitsitsinermut ataatsimiititaliami kiap atorfinitsinneqarnissaanut aalajangiisussami siulittaasuuvoq.

Qinnuteqaatit 19-it tiguneqarsimapput, taakkunanngalu piukkunnaateqarnerpaat sisamat apersorneqarnissaminnut aggersarneqarsimapput. Oqaloqatigiinnerit Aviâja Helmsillu piginnaasai misilittagaalu naapertorlugit, ataatsimiititaliami amerlanerussuteqartut nalilerpaat, Aviâja Helms piukkunnaateqarnerpaasoq. Eqqorpoq, piukkunneqartoq allat aalajangiinissap naggataata tungaani eqqaaneqarsimasoq, tamannalu aamma aalajangiinissap naggaterpiaata tungaani eqqartorneqarpoq. Kisianni tamanna AG’p taamatut isikkoqartinniarsarigaluaraa, assortuunnermik kinguneqarsimanngilaq imaluunniit isumaqatigiinngissutigineqarsimalluni. Atorfinitsitaanermut ataatsimiititaliami siulittaasup aalajangerpaa, piukkunneqartumut sorlermut atorfik neqeroorutigineqassanersoq. Piukkunneqartoq ataaseq amerlanerussutillit piukkuppassuk, taava aalajangerneq siulittaasumut ajornannginnerussaaq, siulittaasup kisimiilluni aalajangiisussaasimaneranut naleqqiullugu.

Ataatsimiisitaliami ilaasortat isaannit isigalugu pitsaanerusumik piukkunnartoqarsimappat, taava taanna amerlanerussuteqartut toqqarsimassagaluarpaat – taamaattumiguna ataatsimiisitaliamik pilersitsisoqartoq, pisortaq atorfinitsitsisoq atorfimmut piukkunnarnerpaap atorfinitsinneqarnissaanut ikiorniarlugu. Matumani aamma taamaasiortoqarsimavoq, Aviâja Helmsip piukkunneqarneratigut toqqarneqarneratigullu. Tamanna ataatsimiititaliap naggataarutaasumik ataatsimiinnerani ataasinngornermi 18. august 2014 pivoq.

Atorfiup ilusaa inissisimaneralu tunngavigalugit, atorfinitsitsinermut ataatsimiititaliap siulittaasua aalajangerneq pillugu Naalakkersuisunut ilisimatitsivoq. Ilisimatitsissut Naalakkersuisunit pingasunngornermi ulloq 20. august 2014 tusaatissatut tiguneqarpoq.

Tamatumunnga uiggiullugu Københavnimi Sinniisoqarfimmi sulisut aalajangerneq pillugu ilisimatinneqarput, tamannalu pingasunngornermi unnukkut ulloq 20. august pivoq. Tamatumunnga ilutigitillugu Tusagassiivik (nammineerluta tusagassiinermut immikkoortortaqarfipput) qitiusumik allaffeqarfimmi sulisunik ilisimatitsissutissamik piareersaaqquara, tassunga ilanngullugu tusagassiutinut nalunaarut. Suliffitsinni suni tamani Inatsisartut Ukiakkut ataatsimiinnissaannut inatsisissatut siunnersuutinik il.il. tunniussiffissap killissaa (26. august 2014) pissutigalugu ulapaartoqarmat, tassunga ilanngullugu nutserisoqarniarnikkut pissutsit,  tusagassiinermut immikkoortortaqarfiup nutaarsiassap salliutinneqarnissaa peqqussutiginngikkukku, erngertumik saqqummiunneqarnissaa qulakkeersinnaasimanngilaa. Inatsisartut ataatsimiinnissaanni atortussat pilliutigalugit nutaarsiassap salliutinneqarnissaa kissaatigisimanngilara.

Sisamanngorneq 21. august Christian Schultz-Lorentzenip ataani atsiortunga Aviâjap atorfinitsinneqarnissaanut atatillugu ataatsimiititaliami isumaqatigiinngitsoqarsimanera uppernarsarniarlugu attavigaanga, tamannalu uanga ilisarisinnaanngilara. Christian Schultz-Lorentzen isumaqarpoq, paasissutissap paasineqarnissaa inunnut tamanut pingaaruteqartoq, tassungalu ilanngullugu, Sinniisoqarfimmi sulisunut ilisimatitsissutiga piumallugu kissaatigaluglu. Christian Schultz-Lorentzen ilisimatippara, qitiusumik allaffissuaqarfimmi sulisut tamaasa ilisimatinnissaannut periarfissaqarsimananga, taamaattumillu ilisimatitsereernissama kingorna aatsaat paasissutissaq Christian Schultz-Lorentzenimut nassiussinnaallugu. Christian Schultz-Lorentzenip ilisimatippaanga, paasissutissaq allagaatinik takunnissinnaatitaanermut pisinnaatitaaffeqarneq tunngavigalugu tunniunneqarnissaa kissaatigalugu, taamaasiorsinnaaneralu Christian Schultz-Lorentzenimut uppernarsarpara. Christian Schultz-Lorentzenip ullup pineqartup ilaa allagaatinik takunnissinnaanermut qinnuteqaat nassiuppaa. Allamik Christian Schultz-Lorentzenilu eqqartugaqanngilagut. Taamaattumik Christian Schultz-Lorentzen uannut sukkulluunniit atorfinitsitaaneq pillugu oqaaseqarumanngitsunga oqariartuuteqarfigineqarsimanngilaq, suliaq sulisumut tunngasuunera pissutigalugu innersuussilluni. Taamaallaat oqarfigaara, tusagassiutinut oqaaseqannginninni nammineerlunga sulisukka ilisimateqqaartariaqarakkit.

Sapaat ulloq 24. august suliffitsinnut avammullu atorfinitsitsineq pillugu ilisimatitsissutissat suli piareernikuunngillat, Christian Schultz-Lorentzenilu Aviâja Helmsip atorfinitsitaanerata ingerlasimanera atorfinitsinneqarsimaneralu pillugit kukkusumik amigartumillu paasissutissartalimmik allaatigisaqarsimavoq.

Taassuma saniatigut ilisimatitsissutigisinnaavara, Tusagassiivik (paasissutissiisarnermut immikkoortortaqarfik) Aviâja Helmsip apersornissaanut periarfissaqarsimaleriarpat, qitiusumik allaffeqarfissuarmi sulisunut Aviâja Helmsip ilisaritinneqarnissaa pilersaarutigigatsigu, taamaasilluta sulisut tamarmik Aviâja Helmsip kinaanera suliffimmullu Københavnimiittumut sunik tunniussaqarsinnaanera paasiniassammassuk. Immaqa ilisarititsineq taanna Christian Schultz-Lorentzenip allaatigisaa tunngavigalugu suli annertunerusumik tusarliunneqarsinnaanissaa pitsaassagaluarpoq.


Inussiarnersumik inuulluaqqusillunga


Svend Hardenberg, Pisortaaneq, Naalakkersuisut Siulittaasoqarfia

Email: svha@nanoq.gl

Mobiltlf: 539936