Silap pissusia pillugu qanittumik oqaloqatigiinnissaq

Nunani tamalaani silap pissusia pillugu Kalaallit Nunaata Danmarkillu akornanni qanittumik oqaloqatigiinnissaq


Avatangiisinut Pinngortitamullu Naalakkersuisup Kim Kielsenip aamma danskit Silap Pissusianut, Nukissiuuteqarnermut Illuuteqarnermullu Ministeriata Rasmus Helveg Petersenip ullumi ulluni pingasuni Kalaallit Nunaata kujataanut tikeraarnertik naammassissavaat. Tikeraarneq Rasmus Helveg Petersenip Kalaallit Nunaannut tikeraarneranut, sapaatit akunneranni kingullermi Ilulissani aallartinneqartumut ilaavoq.

Naalakkersuisoq Kim Kielsen oqarpoq: ”Rasmus Helveg Petersenip pilersitsiviulluartumik oqaloqatiginera, aammalu ilaatigut silap pissusianik ilisimatusarnermi nunanilu tamalaani silap pissusia pillugu isumaqatiginninniarnerni suleqatigiinnitsinnik ineriartortitsinissamut ataatsimoorluta soqutiginnilluarnerput  iluarisimaartorujussuuara”.

Ministereqatigiit marluullutik Kalaallit Nunaata kujataaniinnerminni ilaatigut Narsarsuup eqqaani savaateqarfiit pulaarpaat, aammalu najukkani seqernup qinngornerinik, imermik anorimillu nukissiornermut atorluaanerinut assersuutissanik takusaqarlutik. Savaateqarfik tikeraartitsisartoq Ipiutaq seqernup qinngorneri anorilu atorlugit nukissiuutinik ineriartortitsiviuvoq, aammalu Issormiuni savaateqarfik ukiorpassuarni erngup nukinganik nammineerluni atukkaminik misilittagaqarpoq.

Sumiiffinni marluusuni nukissiuutinik ataavartunik atuinermi ikummatissanik atuinerit annertuumik annikillisinneqarsimapput. Kalaallit Nunaata kujataani savaateqarfiit arlallit erngup nukinganik seqernullu qinngornerinik atuisuupput, arlallillu anorip nukinganik innaallagissiornermik misileraallutik. Nunalerinermi Siunnersuisarfiup naliliinera malillugu savaateqarfik nukissiuutinik ataavartunik atuisoq ukiumut ikummatissamut 70-120.000 koruuninik sipaagaqarsinnaavoq.

”Nukissiuutinik ataavartunik atuinermut assersuutissat, Kalaallit Nunaata kujataani takusatta takutippaat, ataasiakkaat nukissiuutinut ataavartunut aningaasaliisarnerat imminut akilersinnaasoq,” Naalakkersuisoq Kim Kielsen oqarpoq.

Ministerit marluullutik Kalaallit Nunaata kujataanut tikeraarnertik naggaserlugu Qassiarsummi ataatsimiipput, tassanilu ilaatigut Kalaallit Nunaata silap pissusianik ilisimatusarnerit pingaarutillit, kiisalu silap pissusia pillugu ataatsimeersuarnissap, ukioq manna decembarimi Perumi ingerlanneqartussap tungaanut suleqatigiinnissaq oqaluuseraat.


 

Annertunerusumik paasisaqarusunnermi attaveqarfissaq:

Naalakkersuisup allattaa Karen Motzfeldt

Mobil: (+299) 562450

E-mail: karm@nanoq.gl