Pensionisiassanut ileqqaaruteqartarnermut killiliussat

Pensionisiassanut ileqqaaruteqartarnermut killiliussat pillugit oqallinnissamik aallarniineq.


Sisameersut, PFA Soraarnermeersut, Grønlandsbankimeersut, Bank Nordikimeersut, aamma Aningaasaqarnermut Nunamullu Namminermut Naalakkersuisoq sisamanngormat ataatsimiipput. Suliffeqarnermi siunissami pensionisiassanut killiliussat oqaluuserineqarput.

Pensionisianut tunngasut innuttaasumut ataasiakkaatut ataatsimullu isigalugu inuiaqatigiinnut pingaaruteqartorujussuullutillu pingaaruteqaleriartuinnarput. Suliassaqarfimmi pineqartumi aaqqissuusseqqinnissamik suliniutit isumaliutigilluarneqarnissaat oqaloqatigeereernikkullu inatsisissatut siunnersuusiortoqarnissaa susassaqartut isumaqatigiissutigaat. Ileqqaaruteqarnerunissamut kajumilersitsilluarnissap qularnaarneqarnissaa pingaaruteqarpoq. Tamanna ingerlatseqatigiiffiit pensionisiaqartitsiviusut inissisimanerat ineriartornissamullu periarfissaat, kiisalu pisortat aningaasaqarnikkut attanneqarsinnaasumik ineriartornissaasa qularnaartariaqarnera eqqarsaatigalugit pissaaq.

Ukiuni tulliuttuni utoqqaat amerliartuaartussaammata nammineq utoqqalinissamut ileqqaarutit siunissami pensionisiallit isertitatigut tunngavigisaannit amerlanerusut ileqqaarutaassapput. Tamatumani inuit ullumikkut ileqqaaruteqartarnermut aaqqissuussinernut ilaatinneqanngitsut ileqqaaruteqartarnissaannut inatsisitigut erseqqissumik killiliussinissaq pisariaqarpoq, utoqqalinissamullu akilersuutit procentiat qaffanneqartariaqarluni.

Pensionisianut tunngasuni aaqqissuusseqqinnerusussat aningaasanut inatsimmi siumut kalerriutigineqartut inuit pineqartut ileqqaaruteqarnissamut kajumissusiannut sunniuteqarnissaat ingerlatseqatigiiffiillu pensionisiaqartitsiviusut aningaasaqarnerannut tamaviaartitsiviunissaat ataatsimiinnermi ingerlatseqatigiiffiit pensionisiaqartitsiviusut aningaaseriviillu ernumagalugu oqaatigaat. Tamanna pingaartumik piffissamik pensionisianik tunniussinermut akileraaruteqartitsinermik siuartitsisoqarpat atuutissaaq. Taamaattumik allatut ilusiliussisoqarnissaa taakkulu kingunerisassaannik naatsorsuisoqarnissaa ujartorneqarpoq. Isertitanik maani nunatsinni pilersimasunik akileraaruteqartitsinerup Nunatsinni aamma pinissaata qularnaarneqarnissaata politikikkut qularnaarneqarnissaanik kissaateqartoqarnera paasilluarneqarpoq.

Aningaasaqarnermut Nunamullu Namminermut Naalakkersuisoq, Vittus Qujaukitsoq oqaaseqarpoq:

Qanoq ililluta aaqqissuusseqqinnerit aqqutigalugit pensionisiaqalersussat ileqqaaruteqarnerunikkut aningaasaqarnikkut pitsaasumik atugaqartinneqarnissaat tamatumunngalu peqatigitillugu maani nunatsinni naapertuuttumik akileraaruteqartitsinissap qularnaarneqarnissaa pillugu Naalakkersuisut pingaarnertut isumaliutigisaat pillugit ilisimatitsinissamut periarfissaqarnera nuannaarutigaara.

Ingerlatseqatigiiffinnit pensionisiaqartitsiviusunit aningaaserivinniillu toqqaannartumik aaqqisuusseqqinnissami suut ilaatinneqartariaqarnerannik naliliisoqarnera iluaqutaasorujussuuvoq. Tamakku suleqqinnissami ilanngunneqarnissaannut aallaavittut akuersortorujussuuvunga. Nammineq pensionisiassanik ileqqaarnissamut kajumissutsimut akornusersuutaasinnaasumik pisariaqanngitsumik nalornisitsisoqarnissaa pinaveersaartinneqartariaqarpoq. Taamaattumik susassaqartut attuumassutillit oqaloqatigalugit suliniutissanut tunngaviusinnaasunik piaartumillu ingerlanneqarsinnaasunik misissueqqissaartoqarnissaa qilanaaraara.”

 

 

Vittus Qujaukitsoq

 


Attavissaq: Naalakkersuisup allattaa Aviâja Olsen - 345212