Unioqqutitsisumik aalisarneq unitsinneqarli

Stemningsbillede

Kalaallit Nunaanni Aalisarsinnaanermut Nakkutilliisoqarfiup Ilulissani piniarnermut nakkutilliisuata aqutsiveqarfimmi Qeqertarsuup Tunuani unioqqutitsisumik qaleralinniartut marlunngornermi, aggustip 19-ianni naammattoorsimavai.

Aqutsiveqarfimmi Qeqertarsuup Tunuani umitsiaararsortunut 370-it missaanniittunut aggustimut qaleralittassiissutit nungunneqareersimammata, qaleralinniarneq unitsinneqareerpoq.

Ilulissani piniarnermut nakkutilliisup umiatsiaararsortut 13-init aqutsiveqarfimmi Qeqertarsuup Tunuani ningittakkaminnik amualeruttortut naammattoorpai.

- Umiatsiaaqqat ilaata naammattuukkama ningittagai aalisariutip ningittagaanut ilarussimasut ilaajarneqaleruttortut naammattoorpara, piniarnermut nakkutilliisoq oqaluttuarpoq.

Kajumissaarivoq

- Aalisartut kattuffiinut sakkortunerpaamik kajumissaarerusuppunga, ilaasortaminnut kajumissaarissasut aqutsiveqarfik Qeqertarsuup Tunuani unioqqutitsisumik aalisarneq unitseqqussagaat, tamanna akuersaarneqarsinnaanngilluinnarmat, Aalisarnermut, Piniarnermut Nunalerinermullu Naalakkersuisoq, Finn Karlsen oqarpoq.

Kalaallit Nunaanni Aalisarsinnaanermut Nakkutilliisoqarfik ilisimatitsivoq unioqqutitsisumik tunineqartut EU-mut tunineqartussatut akuerineqarsinnaassanngimmata, unioqqutitsisumillu tunisisut pillagassanngortinniarlugit suliassanngortinneqarsinnaammata.

Aqutsiveqarfimmi sumiiffinni aalajangersimasuni umiatsiaararsortut misileraallutik qaleralinniarsinnaatitaapput. Aalisarsinnaanermut akuersissutaatillit Ilulissani, Qeqertarsuarmi, Qasigiannguani, Aasianni aamma Kangaatsiami najugaqartut misileraallutik qaleralinniarsinnaapput.

Misileraalluni qaleralittassiissutigineqartut katillutik 500 tonsiupput, 250 tonsit juulimi aalisarneqarsinnaapput aamma taama amerlatigisut aggustimi aalisarneqarsinnaallutik.

Aqutsiveqarfik Qeqertarsuup Tunuani aalisariutit meterinik arfinilinnik anginerit ukiumut pisassaasa sinneri 1.469 tonsiupput.

Aqutsiveqarfik Qeqertarsuup Tunuani umiatsiaararsortunut aggustimut qaleralittassiissutigineqartut aggustip 14-ianni nungupput, ulloq taanna killigalugu qaleralinniarunnaarlutik.

Qaleralinniarneq 421 tonsinik qaammammut pisassiissutilerlugu septembarip aallaqqaataani aallarteqqinneqassaaq. Septembarip aallaqqaataa sioqqullugu aalisartoqarsinnaanngilaq, taamatullu aalisarnermi atortut septembarip aallaqqaataa nallertinnagu atoqqusaanatik.

Naalakkersuisoqarfik tunitsivinnut kajumissaarivoq tunineqartunut sukannersumik nakkutiginneqqusilluni.

Attavigineqarsinnaavoq Naalakkersuisoqarfimmi pisortaq, Jørgen Isak Olsen. E-mail: jio@nanoq.gl