Nunavummi Inuit kattuffii Nunatsinnut tikeraarput

Inuit kattuffii Nunavut Tunngavik Inc (NTI) kiisalu Qikiqtani Inuit Association (QIA) Nuna-tsinni ulluni 19.-22. august 2014 tikeraarput.

NTI tassaavoq Nunavummi naggueqatigiit Inuit sinniisui naggueqatigiit Inuit Nunavummiittut aningaasaqarnikkut, inooqataanikkut kulturikkullu soqutigisaannik Nunavummi Nunamik Piginnittussaaneq pillugu Isumaqatigiissummi allassimasut naapertorlugit sammisalik.

Qikiqtani Inuit Associationip (QIA-p) Qeqertaarlummiut Inuit 14.000it soqutigisaat sammisarai.

Tikeraarnermi siunertaavoq, Nunavut Nunattalu akornanni suleqatigiinnerup pioreersup nukittorsarneqarnissaa, Issittumi ineriartornerup eqqartorneqarnissaa kiisalu Inuit kulturiata siuarsarneqarnissaa.

Tikeraarnermi NTI’p siulittaasuata Cathy Towtongiep kiisalu QIA’p siulittaasuata Larry Audlalukip Naalakkersuisut Siulittaasuat Aleqa Hammond ulloq 20. August ataatsimeeqatigaat.

Ataatsimeeqatigeereernerup kingorna Naalakkersuisut Siulittaasuat Aleqa Hammond ima oqarpoq:

”Sanilitta Nunavummiittut suleqatigineranni sammisat nukittorsarsinnaasavut amerlapput. Ullumi ataatsimeeqatigiinnitsinni ilaatigut eqqartukkatta ilagaat Issittumi Siunnersuisoqatigiinni suleqatigiinneq, EU’p puisip amiinik eqqusseqqusinnginnera, arfattassiissutit kiisalu illuatungeriilluni ilinniartoqarnerup, sulisoqarnerup aningaasaliissuteqartarnerullu tungaatigut paarlaasseqatigiittarneq.

Nunavummeersut amerlanerusut Nunatsinni ilinniartuullutillu sulinissaat periarfissallu pioreersut atornissaat takorusukkaluarpara kiisalu kalaallit ilinniartut suliffissarsiortullu Canadap Issittortaani ukiuni makkunani periarfissanik takunnissinnaanerunissaat.

Nunavummi naalakkersuisut aamma Nunavut Tunngavik Inc suleqatigalugit anguniakkap taassuma siuarsarnissaa sulissutigissavara. Aamma suliffeqarfiit Nunatsinniittut Nunavummiunik qanimut suleqateqarnerunikkut periarfissat eqqumaffiginerusariaqarpaat.

Ataasinngornermi 25. August danskit nunanut allanut ministeriat Martin Lidegaard peqatigalugu Canadamiut nunanut allanut ministeriat John Baird Københavnimi ataatsimeeqatigissavara, tassanilu aamma qulequttat taakkua eqqartussavagut.”

Nunavut Tunngavik Incip (NTI-p) aamma Qikiqtani Inuit Associationip (QIA-p) Tikeraarnerminni Aalisarnermut, Piniarnermut Nunalerinermullu Naalakkersuisoq Finn Karlsen, Aningaasaqarnermut Nunamullu Namminermut Naalakkersuisoq Vittus Qujaukitsoq, Inuussutissarsiornermut Aatsitassanullu Naalakkersuisoq Jens-Erik Kirkegaard aamma Peqqissutsimut Attaveqarnermullu Naalakkersuisoq Steen Lynge aamma ataatsimeeqatigaa.