Sapaatip-akunnerani 41-mi meeqqat innarluutillit angajoqqaavi qitiutinneqassapput

Familie

Nunatsinni sapaatip-akunnera 41 innarluutilinnut sapaatip-akunneritinneqartarpoq. Ukioq manna immikkut isiginiarneqassaaq siunissami qanoq iliorluta angajoqqaat innarluutilinnik meerallit tapersersornissaat pikkorinnerulerfigisinnaaneripput.

Angajoqqaat innarluutilinnik meerallit angajoqqaatulli allatut meeqqatik asatigaat, inuunerminnilu pitsaanerpaanik periarfissaqarnissaannik kissaateqartarlutik. Kisianni innarluutilimmik meeraqarneq arlalitsigut tassaasarpoq angajoqqaat inuunerannik allannguilluinnartoq unamminartorpassuarnillu pilersitsisoq.

Kikkulluunniit meerallit nalunngilaat ulluinnarisap ataqatigiissinnissaa ajornakusoorsinnaasoq, meeqqat isumassorneqarnissartik maluginiarneqarnissartillu pisariaqartittarmassuk. Innarluutip suunera apeqqutaatillugu, angajoqqaat innarluutilimmik meerallit ullut-unnuallu tamarluinnaasa meeqqaminnut atorsinnaasarpaat. Tamanna qasunartorujussuuvoq, misissuinerillumi takutippaat angajoqqat innarluutilimmik meeral-lit imminnut qimannissaat ilimanaateqarnerusartoq.

Ilaqutariinnermut Inatsisinillu Atuutsitsinermut Naalakkersuisoqarfik 2013-imi innarluuteqarneq pillugu ataatsimeersuartitsimmat, saqqummerpoq oqilisaanneqarnissamik ilaqutariinnillu oqilisaassisartussanik pisariaqartitsineq tassaasut, kattuffiup INOOQAT-ip meeqqat ineriartornermikkut akornutillit angajoqqaavinik oqaloqateqarnerani oqallisigineqakulanerpaasartut ilaat.

Ilaqutariinnermut Inatsisinillu Atuutsitsinermut Naalakkersuisup Martha Lund Olsenip pingaartippaa, angajoqqaat innarluutilimmik meerallit qasuersaalaarnissamut periarfissaqartarnissaat pingaaruteqartuusoq. Ilaatigut pissutigalugu ilaqutariit allanik meerartaqarsinnaasarmata, piffissap ilaani immikkut maluginiarneqarsissaminnik pisariaqartitsisinnaasunik. Tamanna tunuliaqutaralugu oqilisaassinermut akiliutit 1. maj 2013-imiit akunnernut 24-nut 301 kr-niit 1000 kr-nut qaffanneqarput. Taamaakkaluartoq ilaqutariinnik oqilisaassisinnaasunik nammattunik pissarsiniarneq suli ajornakusoorpoq.

Taamaammat Martha Lund Olsen aamma IPIS aalajangerput 2014-imi sapaatipakunnerani 41-mi, angajoqqaat innarluutilimmik meerallit inuiaqatigiinnit avatangiisiminnit taperserneqarnissaminnik pisariaqartitsinerat sammineqassasoq. Anguniagaq pingaartoq tassaavoq angajoqqaat atugarisaasa paasineqarnissaat, ulluinnarisaminnilu unammillertagaat pillugit oqallinnerup aallartinnissaa.

IPIS-ip nalinginnaasumik kaammattuutigaa, sapaatip-akunnera 41 atorneqassasoq innuttaaqativut innarluutillit, taakku atugarisaat uagullu tapersiinissamut periarfissavut pillugit sammisaqarnissamut.

IPIS-imut innarluutillit pillugit sapaatip-akunnerani qulequtaasumut atatillugu ingerlanniakkanut sammisaqaatinullu tapiissutinik qinnuteqartoqarsinnaavoq.

Qinnuteqaatit IPIS-imeeriissapput kingusinnerpaamik 12. september 2014.


Qinnuteqaatit nassiunneqassapput immersugassaq uaniittoq immersorlugu: www.ipis.gl imaluunniit toqqaannartumik IPIS saaffigalugu.


Paasissutissat annertunerusut uunga saaffiginnilluni piniarneqarsinnaapput:

Naja Rosing Fleischer
Immikkoortortami pisortaq
IPIS

Postboks 970
3900 Nuuk
Tlf. 34 66 80
Fax: 34 42 98
E-mail: ipis@nanoq.gl

 

Paasissutissat:

Innarluutillit pillugit inatsisit naapertorlugit inuit annertuumik innarluutillit nalinginnaasumik inuunermut sapinngisamik qaninnerpaamik inuuneqarnissaat qularnaarneqassaaq. Tamatumani ilaatigut pingaartinneqarpoq innarluutillip nammineq angerlarsimaffimminiiginnarnissaa, tamanna pineqartup nammineq kissaatigippagu. Angajoqqaat innarluutilinnik qitornallit aammattaaq amerlanertigut meeraq sapinngisartik naapertorlugu angerlarsimaffianiitiinnarusuttarpaat,

Ilaqutariit annertuumik innarluutilimmik ilaqartut, arlalitsigut ulluinnarisaminnik innarluutilimmut naleqqussaallutik inuusarput, innarluuteqartup ulloq-unnuarlu ikiorneqarnissani pisariaqartissinnaammagu. Tamatuma kingunerisinnaavaa ilaqutariit ataatsimik amerlanernilluunniit innarluutilimmik qitornaqartut meeqqamik innarluuteqartumik aallussinerulernerat, meeqqaminnullu allanut imminnulluunniit piffissaaruttoorsinnaallutik.

Innarluutillit pillugit inatsisit malillugit, angajoqqaat allallu angerlarsimaffimminni innarluutilimmik ulluinnarni isumaginnittut oqilisaanneqarnissaminnut periarfissaqarput. Ilaqutariit ingerlalluarnissaannut inooqatigiittuarnissaannullu pingaarute-qartorujussuusinnaavoq, ilaanneeriarluni qasuersaarfissaqalaarnissaq, soqutigisanik aallussisinnaalluni innarluutiliinnaanngitsumillu sammisaqalaarluni.

Tapiiffigineqarnissamik qinnuteqaat