Naligiissaarineq pillugu apeqqummut oqimaaqatigiimmik aaqqiissut

Vittus Qujaukitsoq

Naalakkersuisut akuersissutigaat Kommuneni naligiissaarinermut 2015-moortumut aaqqiissutaagallartoq.

Kommuneni naligiissaarisoqarnissaa pillugu apeqqummut, ajoraluartumik kommunet akornganni isumaqatigiinneq anguneqanngitsoorpoq. Taamaammat Naalakkersuisut nutaamik naligiissaarinissaq pillugu aammalu tapiissutinut pilersaarutaagallartumik 2015-mut atuuttussamik aalajangiussaqarput.

Naalakkersuisut kommunellu januaarip 22-iani 2014-mi missingersuutip suleqatigiissutiginissaanut isumaqatigiissuteqarput, taamalu kommunet sisamaasut, KANUKOKA kiisalu Naalakkersuisut
naligiissaarinerup aaqqiissutissaanik naleqqunnerusumik nutaamik ilusilersukkamik saqqummiussaqarput.

Illuatungeriillu isumaqatigiissutigaat, aaqqiissutissaq nutaaq assigiimmik pisussaaffiliisumik aaqqiissutaassasoq, taamalu aalajangiinermut tunngavigisat kinaassusersiunngitsumik pineqassasut.

Ataatsimiinnerpassuit pisaraluartut, aammalu kommunet ataatsimoorussaminnik aaqqissutissaasinnaasunik ilutsinik assigiinngitsunik saqqummiuffigineqaraluartut taamaattoq kommunet sisamaasut akornanni isumaqatigiissuteqartoqanngitsoorpoq. Kommunet ilisimaarilluarpaat, tamarmiullutik isumaqatigiinngikkunik tamanna Naalakkersuisut aalajangiinerannik kinguneqarsinnaajumaartoq.

Taamaaliornikkut aningaasanik aqutsinermi pilersaarusiorneq piaartumik inissinneqarsinnaaniassammat.

Aningaasaqarnermut Nunamullu Namminermut Naalakkersuisoq Vittus Qujaukitsoq ima oqarpoq:

”Pisariaqarpoq Naalakkersuisut aaqqiissutaagallartumik ilutsimik nutaamik 2015-mut atuuttussamik aalajangiissuteqarnissaat. Naalakkersuisut ilisimaaraat, 2015-mut ilusissatut aaqqiissutaagallartussatut aalajangerneqartoq kommunet tamakkerlutik nuannarivallaarnavianngikkaat. Ilaat suli annerusumik perusussasut qularnanngilaq, ilaallu minnerusumik tunniusserusussallutik.

Naalakkersuisut taama aalajangernertik oqimaaqatigiissaarinertut isigaat. Apeqqutaalerporlu kommunalbestyrelset sisamaasut, aningaasaqarnikkut sinaakkutaasut ilisimaneqareersut iluanni qanoq tulleriissaariniarnersut.Aalajangernerlu tamanna kommunet namminneq oqartussaassutsimik tigumminnissimanerata malitsigiinnarpaa.

Naligiissaariniarnerup nutaamik ilusilersorniarnerata suliarinerani, paasissutissanik assigiinngitsunik amigaateqarneq pissutaalluni arlalitsigut ajornakusoorfeqarsimavoq.

Taamaammat kommuneni ataasiakkaani innuttaasut inuttussutsimikkut agguarneqarnerat, ukiumikkullu agguarneqarnerat pingaarnerutinneqartariaqarsimavoq.

Tamanna kommunet ataasiakkaat aningaasartuutaasa nalilersorneqarnerinut qajannaatsumik tunngaviliivoq. Paasissutissanilli nalunaarsuineq pitsaanerugaluarpat assiliaq erseqqinnerusinnaagaluarpoq.

Vittus Qujaukitsoq nangilluni ima oqarpoq:

”Aaqqiissutaagallartoq immaqa politikkikkut naaperiarfiusumi pitsaanerpaajunngilaq, periarfissatulli isigigaanni ajunnginnerussalluni. Naalakkersuisut Naatsorsueqqissaartarfik suleqatigalugu, aammalu Kommunit Kanukokalu peqatigalugit paasissutissanik tunngavittut atugassanik pitsaanerusunik 2016-miillu ataavartumik atuuttussanik suliaqarnissartik salliutissavaat. Taamaalilluni illuatungeriit tamarmiusut kattutsinneqarsinnaalissallutik. Tamannali anguneqassappat siunnerfeqarluartumik sunniuteqaqataasoqartariaqarpoq, suliarlu maanna aallartereerpoq”.

Taama aalajangiineq ataani tabelimi allassimasumik tunngaveqarpoq.

Malitsigissavaalu Kommune kujalleq 23 mio. koruuninik pissarsissasoq, Qaasuitsullu kommunia 34 mio. koruuninik pissarsissasoq, aningaasallu kommuninit marluusunit aaneqassapput, tassalu Kommuneqarfik sermersooq 54 mio. koruuninik akiliuteqassaaq, Qeqqatalu kommunia 3 mio. koruuninik akiliuteqassalluni.