EU immikkut akuerisaalluni saattuarniarsinnaavoq

Naalakkersuisut immikkut akuersissutigaat aalisariutit EU-meersut sumiiffiit saattuanut karsini pineqartartut iluini 12 sømilimik killeqarfiusoq tikillugu aalisarsinnaassasut.

Naalakkersuisut aalisariutit EU-meersut saattuanut karsini aalisarsinnaanerinut akuersissuteqarnerminnut erseqqissaassutigaat piujuaannartitsineq tunngavigalugu karsini ukiuni kingullerni qulini aalisarfiusimanngitsuni aalisartoqarsinnaassasoq.

Naalakkersuisut ilanngullugu erseqqissaassutigaat EU-mik isumaqatiginninniarnissaq sioqqullugu, isumaqatigiissutit naapertorlugit, immikkut akuerineqarsinnaasoq.

EU-millu suli isumaqatiginniartoqartinnagu isumaqatiginniutaajumaartussanut suleqatiginnikkumanninnermik tamanna takutitsinerusuusoq.

Naalakkersuisut aamma erseqqissaassutigaat immikkut akuersissuteqarnermi nunatsinni aalisartut pisassaannik ilanngartuisoqanngitsoq.

Saattuarniarneq pillugu Namminersornerullutik Oqartussat nalunaarutaat naapertorlugu avataasiorluni saattuarniarneq aalisarfinni sisamani matoqqavoq.

Matoqqasut tassaallutik Paamiut eqqaanni saattuanut karsimik pineqartartoq, Maniitsup-Kangaamiut eqqaanni saattuanut karsi, Sisimiut eqqaanni saattuanut karsi aamma Aasiaat eqqaanni saattuanut karsi. Karsit pineqartut 2004-mi pilersinneqarput.

Tamatuma nassataanik angallatit 75 BRT/120 BT-inik anginerusut tamarmik aalisaqqusaajunnaarput. EU-lli 200 tonsinik tamakkiisumik aalisarsimanngisaminik pisassinneqarnera eqqaassanngikkaanni angallatit anginerit saattuarniarunnaarsimapput.

Aalisarneq pillugu inatsimmi kiisalu Kalaallit Nunaata EU-llu Aalisarnermi suleqatigiinnissamik isumaqatigiissutaat naapertorlugit EU tunngaviusumik killeqarfik, aalisarfigeqqusaanngitsut taakku ilaannut ilaasoq, 12 nautical milesinik nigorlugu aalisartussaavoq.

EU-p pisassiissutit aalisarneq pillugu isumaqatigiissutitigut pissarsiani tamakkerlugit aalisarsinnaasimanngilai, taamaammat Aalisarnermut, Piniarnermut Nunalerinermullu Naalakkersuisoqarfik isumaqarpoq ajunngitsorsiassaqartitsineq Kalaallit Nunaannut iluaqutaassasoq.

 

Paamiut avataanni, tungujortoq, 12 sømil tikillugu saattuarniarfik.

Sisimiut-Maniitsup eqqaanni saattuarniarfik.

Aasiaat eqqaanni saattuarniarfik.

 

Attavigineqarsinnaavoq: Jørgen Isak Olsen, Naalakkersuisoqarfimmi pisortaq. E-mail: jio@nanoq.gl

PDF