Nukissiuutit silalu oqallisaassapput

Avatangiisinut Pinngortitamullu Naalakkersuisoq Kim Kielsen sapaatit akunneranni uani danskit Silap Pissusianut, Nukissiuuteqarnermut Illuuteqarnermullu Ministeriata Rasmus Helveg Petersenip Kalaallit Nunaannut tikeraarneranut tikeraartitsisuuvoq.

Oqallisigineqartussat ilaatigut tassaapput Kalaallit Nunaanni nukissiuutit ataavartut atorlugit aaqqiissutit, kalaallit danskillu ataatsimoorlutik silap pissusianik ilisimatusarnermut suleqataanerat aammalu silap pissusianut atatillugu nunat tamalaat akornanni isumaqatigiinniarnissanut tunngatillugu suleqatigiinneq.

Ippassaq ataasinngornermi ministerit Utoqqarmiut Kangerluarsunnguani erngup nukinganik innaallagissiorfik pulaarpaat, tassani Kalaallit Nunaanni nukissiuutinik ataavartunik atuineq eqqartorneqarluni.

Silap pissusianut ilisimatusarnermut tunngatillugu Kalaallit Nunaata peqataaffigisaasa ilai Pinngortitaleriffimmi ullumi ministerimut angalaqataanullu saqqummiunneqassapput. Suliat taakku marluusut Kalaallit Nunaata nunarsuarmi silap pissusiata oqallisigineqaqisumut peqataaneranut assersuutissaapput.

Utoqqarmiut Kangerluarsunnguanni innaallagissiorfimmi, Kalaallit Nunaata erngup nukinganik innaallagissiorfiisa siullersaanni annersaannilu danskit ministeriata paasivaa, erngup nukinganik innaallagissiorfik innaallagissiorfimmut nalinginnaasumut dieselitortumut taartaasoq, taamaasillunilu ukiut tamaasa uulia 35 millioner literit missaannik annertussusilik sipaarneqartartoq.

Taanna CO2-p gassinik silap pissusianut kissakkiartortitsisartunik aniatitassap ukiumut 92.000 tonsiusup annertoqatigaa.

Ulluni tulliuttuni Kim Kielsen danskit aallartitaat ilagalugit Kalaallit Nunaata kujataanut angalassaaq, tassanilu ilaatigut taqqavani savaateqarfiit nukissiuutinik ataavartunik iluatsitsiffiusumik pissutsinullu immikkut ittunut naleqqussarneqarsimasunik atuiffiusut pulaarneqarnissaat pilersaarutigineqarpoq.

Nukissiuutinik ataavartunik atuinerup annertusineqarsinnaanissaanut ministerit ataatsimoorlutik anguniakkatik angalanerup nalaanni eqqartorsinnaassavaat kiisalu silap pissusaa pillugu ataatsimeersuarnissap december 2014-imi Perumi ingerlanneqartussap tungaanut kalaallit-danskit suleqatigiissutigisassaat eqqartorneqassapput.

Ministerit Kalaallit Nunaata kujataani angalanertik aggustip ulluisa 21-ianni naammassissavaat.