Isumaqatigiissutip aatsitassarsiornermi ineriartorneq nukittorsarpaa

Suleqatigiinnissamik isumaqatigiissummi nutaami, Inuussutissarsiornermut, Aatsitassaqarnermut Suliffeqarnermullu Naalakkersuisup Jens-Erik Kirkegaardip aamma silap pissusaanut, nukissaqarnermut sanaartornermullu ministerip (klima-, energi- og bygningsministerip) Rasmus Helveg Petersenip akornanni isumaqatigiissutaasumi suleqatigiinnissamik toqqammavissaq nutaaq pitsaanerlu oqaasiuvoq qitiusoq. Isumaqatigiissut 1. januar 2015-imit 31. december 2019-p tungaanut atuutissaaq, maannakkut ukiunut tallimanut suleqatigiinnissamik isumaqatigiissutaasoq taarserpaa.

Isumaqatigiissut nutaaq pingasunut agguataarneqarpoq: Sinaakkutissatut, suliniutinut aamma siunnersuisarnermut isumaqatigiissut. Sinaakkutissatut isumaqatigiissut, ministerit atsioqqammigaat suliniutinut siunnersuisarnermullu isumaqatigiissuteqartitsisinnaavoq.

Siunnersuisarnertut aamma ilisimatusarnermik pilerisaarinermillu suliniutinik piviusutut ilusilinnik Kalaallit Nunaanni geologiskimik piginnaasanik pilersikkiartortitsinissamik isumannaarinermillu GEUS-ip peqataaqataanissaa isumaqatigiissutip nassataraa. Taamatuttaaq Kalaallit Nunaanni geologiskimik piginnaasanik ilisimasanillu pissarsiortornerit GEUS-ip tapersersussavai.

Isumaqatigiissutigisap ilisimatusarnikkut paasissutissanillu suliassaqarfikkut GeoSurvey Greenlandimik (GSG-mik) pilersitaqalerneq tapersersussavaa. Pilersaarut malillugu GSG 1. januar 2016-imi pilersinneqassaaq.

GSG-mut inatsisissatut tunngavigisaq Inatsisartut ataatsimiinnissaanni takkutilersumi oqaluuserineqassaaq.

”Klima-, Energi- og Bygningsministereqarfillu isumaqatigiissusiarput tulluusimaarutigaara. Geologiskimik misissuinerni GEUS-ip annertuumik peqataajuarnissaa isumaqatigiissutip nassataraa, aammalu nunami maani geologiskimik piginnaasatsinnik pilersitsiniarnitsinni suliaqarfigalugu ikiussavaatigut. Tamanna assut iluarisimaarpara," oqarpoq Jens Erik Kirkegaard.

Iluareqalugulu nangippoq isumaqatigiissut tassaasoq Kalaallit Nunaata GEUS-illu akornanni ukiut hunnorujut sinnerlugit naleqarluartumik suleqatigiinnerup naaneranik oqaaseqarniarnermik suleqatigiinnissamik isumaqatigiissut ilumuunnginneraasoq, paarlattuanilli suleqatigiinnerup pitsaasup kinguneqarluartullu nanginneqarnera.

Klima-, energi- og bygningsminister Rasmus Helveg Petersen oqarpoq:

”Kalaallit Nunaanni aatsitassaqarnermik suliassaqarfiup ineriartortinnera pillugu ungasissumut isigalugu suleqatigiinntsinnik isumaqatigiissut nutaaq atorlugu ingerlatseqqissinnaanerput nuannaarutigaara.”

Sinaakkutissatut isumaqatigiissut nutaaq marlunngorneq 19. august Inuussutissarsiornermut Aatsitassaqarnermullu Naalakkersuisumit, Jens-Erik Kirkegaardimit aamma Klima-, Energi- og Bygningsministerimit, Rasmus Helveg Petersenimit atsiorneqarpoq.

Suleqatigiinnissamik isumaqatigiissummut tunngatillugu apeqqutit Inuussutissarsiornermut, Aatsitassarsiornermut Suliffeqarnermullu Naalakkersuisoqarfimmi naalakkersuisup allattuanut Kirsten Enequistimut, oqarasuaat +299 345604-mut saaffiginnissutaassapput.

Klima-, energi- og bygningsminister Rasmus Helveg Petersen tusagassiornermut suleqataasoq Rasmus Bjørn aqqutigalugu attavigineqarsinnaavoq,
rasbj@kebmin.dk imlt. +45 41729077 aqqutigalugit.