Ukioq atuarfiusoq nutaaq, periarfissat nutaat aamma siunissaq nutaaq

Naalakkersuisut sinnerlugit ilinniagaqartut aamma atuartut tamaasa nunatsinni tamarmi ukiumik atuarfiusumik nutaamik aallartitsilluarnissaannik kissaappakka, - aamma meerarpassuarnut, ilaqutaannut inuiaqatigiinnullu ulluni makkunani atualeqqaartitsisunut qamannga pisumik pilluaqqusivunga.

Ukiumik atuarfiusumik aallartitsineq, siullermeerlunilu inimut atuarfiusussamut isersimagaanni atuartitaanermi aallarterlaatut, imaluunniit ilinniagartuunngorniartutut misilittagalittut Ilisimatusarfimmi ilinniagartuunngorniarfimmiluunniit allami ukiumik kingullermik aallartitsisimagaanni, ukiup atuarfiup aallartinnerani nutaamik tamanut aallartitsinerupput.

Ukioq atuarfiusoq nutaaq ilisimasassanik nutaanik nassataqassaaq, inunnik nutaanik naapitsiffiussaaq, nutaanillu unammilligassaqarfiussalluni, piumassuseqarluarnissamik sulerusussuseqarnissamillu atuartumut ilinniagaqartumullu piumasaqaateqartoq.

Inuiaqatigiinni inuuffigisatsinni periarfissaqartinneqarpugut ilinniartitaanerup akeqanngitsumik pissarsiarinissaanut, tamannalu pingaartillugulu qujamasuutigisassagatsigu eqqaamassavarput.

Tamanna immikkut pisinnaatitaaffigaarput, kisiannili uagut nammineerluta siunissarput inuiaqatigiillu siunissaat eqqarsaatigalugit periarfissap tamatuma iluaqutiginissaanut akisussaaffeqarpugut.

Siunissami iluatitsilluarnissarput nammineer-luni aggertanngilaq. Ilinniartitaanerlu ataatsimoorluta akisussaaffigaarput.

Kisianni aamma toqqissisimasunik avatangiiseqarneq tapersersorneqarnerlu pisariaqarput, alapernaatsuuneq, ilikkagaqarusussuseq ineriartornissamullu piumassuseqarluarneq inerititaqarfiusumik aallunneqassappata.

Atuartunit ilinniartunillu namminernit akisussaassuseqarneq piumasaqaataavoq, kisiannili aamma ilaqutaasuniit, angajoqqaaniit ikinngutsitsinniillu.

Pingaaruteqarpoq uagut inuiaqatigiittut ilinniagaqartortatsinnik atuartuutitsinnillu tapersersuinissarput.

Atuarfitta ilaqutariillu suleqatigiillutik meerartatta inuusuttortattalu ineriartornerannut naggorissaaqataanissaat pingaaruteqarluinnarpoq.

Taamaattumik Naalakkersuisut nuannaarutigaat Nuna tamakkerlugu ilitsersuisarfik maanna piviusunngormat, taamalu isumaginninnermi siunnersortinit siunnersorneqarsinnaaneq aamma tarnip pissusiinut tunngasunik ajornartorsiutinut ikiorserneqarsinnaaneq illoqarfinni anginerni tallimani ilinniartitaanermik ingerlatsiffiusuni neqeroorutigineqarsinnaalermata, piffissallu ilaanni illoqarfiit sinnerini ilitsersuisarfimmiit angalaqatigiinnik angalasoqartillugu siunnersuisoqarsinnaalerluni.

Taamaattumik atuartortagut ilinniagaqartortagullu peqatigalugit ukioq atuarfiusoq nutaaq periarfissallu nutaat takkussuuttut nuannaarluta ornitsigit, ataatsimoorlutalu akisussaaffipput suleqatigiissutigalugu, taamaasillutalu atuartortagut, ilinniagaqartortagut inuiaqatigiillu siunissatsinnut toqqissisimasumut matuersaammik tunillutigit.

Inussiarnersumik inuulluaqqusillunga

Nick Nielsen

Paasisaqarnerorusukkaanni attavigineqarsinnaapput aqutsisunut allatsit, Ilinniartitaanermut, Ilageeqarnermut, Kultureqarnermut Naligiissitaanermullu Naalakkersuisoqarfik; Toqq/direkte 345705 iml. 345711, email: iiknn@nanoq.gl

 

 

Assilisat