Nalaatsorneriinnakkut meqqeq nassaarivaa

Kapisillip nalunaaqutaanik ukioq manna akissarsitinneqartoq tassaavoq Susanne Petersen Thorin, Aasiaat. Aasianni kommunip allaffiani ullaap tungaani akissarsitinneqarpoq, akissarsiaa Qaasuitsup kommuniani kommunalbestyrelsimi Enoksen Sandgreen, Aalisarnermut, Piniarnermut Nunalerinermullu Naalakkersuisoq, Finn Karlsen, sinnerlugu, tunniussisuulluni.

Kapisilinnut nalunaaqutsiunneqartartoq akissarsinneqartup nalaatsorneriinnakkut natermiittoq upernaaq naammattoorpaa, qerititsivitsik iluarsaaleruttorluni.

- Takoqqaarakku uannut oqarfigiinnarpunga, aamma sunaana, Susanne Petersen Thorin, Aasianni kommunip allaffiani allaffimmiuusoq oqaluttuarpoq.

Paasisinnaannginnamiuk sunaanersoq internetsikkut aamma misissuilluni paasiniaagaluarpoq.

- Suliffinnut nassarakku suleqatimma oqaluttuuppaannga kapisilinnut nalunaqutsiussaasartoq, Susanne Petersen Thorin, nalunaaqquttamik Pinngortitaleriffimmut ullualunnguit qaangiuttut nassiussisoq oqarpoq.

Akissarsitinneqartup ilimagaa kapisilimmik nalunaaqutalimmik pisiniarfimmi pisisimassalluni.

- Uagutsinni nalliussisaqartussaalluta pisiniarfinni kapisilinnik amerlasuunik pisivugut, ilimagaaralu taakku arlaanneersuussasoq, Susanne Petersen Thorin oqaluttuarpoq.

Kapisilimmut nalunaaqutsiunneqartartoq Susanne Petersen Thorinimit nassaarineqartoq kuummi River Ure Yorkshiremi 1975-mi meqqiliunneqarsimavoq.

NASCO Frankrigip illoqarfiisa ilaanni Saint-Malomi ukiumoortumik ataatsimeersuarnerminut atatillugu meqqinik nassiunneqarsimasunik makitsivoq.

NASCO

NASCO-p, North Atlantic Salmon Conservation Organistation, ilisimatusarnikkut kapisilinnut nalunaaqutsiussanik tunniussisarnerup tuaviornerusumik pitsaanerusumillu ingerlanneqalernissaa anguniarlugu kapisilinnik nalunaaqutsiisarneq aallartissimavaa.

Kapisillit nalunaaqutserneqartarput kapisillit pisarineqartarnerat angalanerallu annerusumik ilisimaqarfigilerniarlugit.

Kapisilinnik nalunaaqutsiisarnermut suliamut atatillugu NASCO-p sumiiffinni kommissioninit sisamaasunit immikkut 1.500 dollarsinik aningaasartalerlugu ukiumoortumik tunniussisoqartarpoq. Nunatta Kitaani Kommissioni Canadameersunit, USA-meersunit, EU-meersunit nunatsinneersunillu ilaasortaqarpoq. inuttaqarpoq.

Kalaallit sunngiffimminni inuussutissarsiutigalugulu aalisartartut tamarmik, pinngortitaleriffimmullu kapisilinnut nalunaaqutsiussanik nassiussaqarsimasut, NASCO-p Canadami aappaagu ukiumoortumik ataatsimiinnissaanut makitsinermut peqataanissaminnut periarfissaqarput.

Aalisarnermut, Piniarnermut Nunalerinermullu Naalakkersuisoqarfiup erseqqissaatigeqqissavaa sunngiffimmi inuussutissarsiutigalugu aalisarnermi kapisilinnik pisarineqartunik tuniniaaneq tamarmi Kalaallit Nunaanni Aalisarnermik Nakkutilliisoqarfimmut nalunaarutigineqartassammat. Nalunaaruteqarnissamut immersuiffissaq kommunini pineqarsinnaavoq imaluunniit www.nanoq.gl –imi pissarsiarineqarsinnaalluni.

Ukioq manna aggustip aallaqqaataanit oktobarip 31-annut, 2014, kapisilinniarsinnaasoqarpoq.

Malittarisassat Kapisilinniarneq pillugu Namminersorlutik Oqartussat nalunaarutaanni nr. 12 , 1. august 2012-imeersumi takuneqarsinnaapput.

Attavigineqarsinnaavoq: Emanuel Rosing, Aalisarnermut, Piniarnermut Nunalerinermullu Naalakkersuisoqarfimmi immikkoortortaqarfimmi pisortaq. E-mail: emanuel@nanoq.gl