Imigassaq, hashi naamaartarnerlu pillugit ilisimasaqarpit?

Peqqissutsimut Attaveqarnermullu Naalakkersuisoqarfik Paarisalu PiSiu – Pinerlutsaaliuinermut Siunnersuisoqatigiit suleqatigalugit imigassaq, hashi naamaartarnerlu pillugit meeqqanut, inuusuttunut angajoqqaanullu atuagaaqqanik saqqummersitsivoq.

Innuttaasut ilinniakkaminnillu tunngaveqarlutik sullissisut atuagaaqqat nittartakkaniit www.peqqik.gl, www.pisiu.gl pissarsiarisinnaalerpaat. Kommunit piffissami aggersumi atuagaaqqat allakkatigut nassiussat tigussavaat. Inuuneritta II-mut atatillugu meeqqat inuusuttullu hash-imik pujortalinnginnissaat, naamaartalinnginnissaat imigassartuliaannginnissaallu atuagaaqqiornermi anguniagaavoq.

Atuagaaqqani meeqqat inuusuttut angajoqqaallu aanngajaarniutit pillugit ilisimasaqalissapput siunnersorneqassallutillu, pinaveersaartitsinermi siunnersortit, ilinniartitsisut assigisaallu ilinniartitsinermi atortussaminnik pissarsissapput. Atuagaaqqat aanngajaarniutinut tunngatillugu pinaveersaartitsinermi suliniutaasunut allanut tapertaapput.

”Atuagaaqqat nutaat aanngajaarniutit pillugit ilisimasat annertunerulernissaannut qulakkeereqataassapput, taamaasillutik meeqqat inuusuttullu ilisimasatik tunngavigalugit peqqinnartunik toqqaasinnaanngussapput, angajoqqaallu meeqqaminnik ilitsersuisinnaanngorlutik tapersersuisinnaanngorlutillu ilisimasassanik pissarsisinnaassapput. Peqqissutsimut inuunerullu naleqassusaanut ajoqutaanngitsumik aanngajaarniutit pillugit qanoq ileqqoqarnissap meeqqanit inuusuttunillu ilikkarneqarnissaa pingaaruteqarpoq” Peqqissutsimut Attaveqarnermullu Naalakkersuisoq Steen Lynge oqarpoq.

”Atuagaaqqat PiSiu´p iliuusissatut siunniussaanut- meeqqat inuusuttullu pingaarnerutillugit sammisaqartumut- naleqqulluarput. Aanngajaarniutit sunniutaannik kingunerisartagaannillu meeqqat, inuusuttut angajoqqaallu ilisimatinnissaat pingaaruteqarpoq, Kalaallit Nunaanni atuagaaqqat taamaattut innuttaasunit piumaneqarnerat PiSiu-mi malugaarput. Taamaammat Peqqissutsimut Attaveqarnermullu Naalakkersuisoqarfimmik suleqateqarneq Siunnersuisoqatigiinni nuannaarutigeqaarput, naammassisallu meeqqanut, inuusuttunut angajoqqaanullu iluaqutaajumaarnissaat neriuutigisarput, assut iluarisimaarparput”, PiSiu-mi siulittaasoq politimesteri Bjørn Tegner Bay oqarpoq.

Aanngajaarniutinut tunngatillugu pinaveersaartitsinissap suli annertuumik pisariaqartinneqarnera HBSC-mik qulequtserlugu 2010-mi misissuisitsinerup takutippaa. 15-iniit 17-inut ukiullit akornanni hash-imik pujortarsimasut 19 %-iusut, 13-inik ukiullit akornanni aalakoorsimasut 30 %-iusut, 16-ininillu ukiullit akornanni naamaarsimasut 25 %-iusut, misissuinerup takutippaa.

 

Atuagaaqqat
Arfinilinnik atuagaaqqanik saqqummersitaqarpoq. Pingasut angajoqqaanut inersimasunullu kiisalu allat aamma pingasut meeqqanut inuusuttuaqqanullu. Saqqummersitat pingasunut agguaqqapput, imigassaq, naamaarneq aamma hashi.

Angajoqqaanut
Imigassaq pillugu suna nalunngiliuk?
Naamaarneq pillugu suna nalunngiliuk?
Hashi pillugu suna nalunngiliuk?

 

Meeqqanut inuusuttunullu
Imigassaq pillugu suna nalunngiliuk?
Naamaarneq pillugu suna nalunngiliuk?
Hashi pillugu suna nalunngiliuk?

 

Paasissutissat sukumiinerusut peqqinnissaq pillugu siunnersorti Lisa Christiansen oqarasuaatikkut: +299 34 66 50 imal. e-mail-ikkut: lich@nanoq.gl, imal PiSiu-mi Pinerlutsaaliuinermut Siunnersuisoqatigiit, Det Grønlandske Kriminalpræventive Råd allatsi - Christina Mølholm oqarasuaatikkut toqqaannartumik: +299 36 51 11 imal. e-mail-ikkut: cmo018@politi.dk. attavigalugu pissarsiarineqarsinnaapput.