Kinap aallartitaata Aleqa Hammond ataatsimeeqatigaa

Kinap Danmarkimi aallartitaata toqqarneqaqqammersup, Liu Biweip ulluni makkunani Nunarput tikeraarpaa.

Pingasunngornermiit ulloq 13. augustimiit sapaammut ulloq 17. augustipp tungaanut Kinamiut aallartitartaavata, Liu Biweip, Nuuk Ilulissallu tikeraassavai.

Tikeraarnermi siunertarineqartoq tassaavoq, politikkikkut qulequttanik Naalakkersuisunik oqaloqateqarnissaq kiisalu aallartitatut nutaatut Nunatsinnut tunngasunik ilisimasaqalernissaq.

Taamaattumik sisamanngornermi 13. august Naalakkersuisut Siulittaasuata Aleqa Hammondip Liu Biwei ataatsimeeqatigaa.

Ataatsimiinnermi qulequttat Nunatta Kinallu akornanni attaveqatigiinnermut attuumassuteqartut, soorlu assersuutigalugu aalisakkanik qalerualinnillu niueruteqarneq, aatsitassat kiisalu Issittumi Siunnersuisoqatigiit, Kinap 2013-imi aalajangersimasumik alaatsinaattutut inissisimaffigiligai oqaluuserineqarput.

Aleqa Hammond ataatsimeeqatigeereernerup kingorna ima oqarpoq:

”Piffissami immikkut ittumi, Asiamut Kinamullu attaveqateqarnitta nutaamik pissanganartumillu ineriartornerata nalaaniittumi Kinap aallartitartaavata maanga tikilluaqqusinnaanera nuannaarutigaara.

Kina nunaavoq uagutsinnut pingaaruteqartoq, soorluttaaq aamma Kinap Issittumi Siunnersuisoqatigiinni attaveqarneranut atatillugu Nunarput Kinamut pingaaruteqartoq.

Neriuppunga, Kinap aallartitaa nutaaq peqatigalugu attaveqaatitta suli annertunerusumik ineriartorteqqissinnaassallutigu, ingammik niueqatigiinnerup, takornariaqarnerup, ilisimatusarnerup aningaasaliinerullu tungaatigut, Kinap Nunattalu tamarmiullutik imminnut neqeroorfigeqatigiiffigisinnaasaat.”

Liu Biweip tikeraarnermini Inuussutissaqarnermut Aatsitassanullu Naalakkersuisoq Jens-Erik Kirkegaard aamma ataatsimeeqatigaa.

Taassuma saniatigut aallartitap nutaap aamma Ilisimatusarfik, Pinngortitaleriffik Royal Greenlandilu pulaassavaat.

Paasissutissat sukumiinerusut uunga saaffiginninnikkut pissarsiarineqarsinnaapput: Allan Olsen, Nunanut Allanut Pisortaqarfimmi Siunnersortaaneq, oqarasuaat: +299346410