Japanimi naalakkersuisunit tikeraartut siullersaat

Japanimi Viceminister Nunamut Namminermut aamma Attaveqaqatigiinnermut akisussaasoq Kalaallit Nunaannut tikeraarsimavoq Naalakkersuisunik ataatsimeeqatiginnikkiartorluni.

Viceminister Tadahiko Ito, Japanimi Naalakkersuisuni Nunamut Namminermut aamma Attaveqaqatigiinnermut akisus-saasoq, ulluni augustip 10-aniit 12-anut Nunatsinnut tikeraarpoq.

Nunatsinni tikeraarneq pivoq Naalakkersuisunut Siulittaasup Aleqa Hammond-ip Københavnimi 1. maj 2014-imi Japanimiut Nunanut allanut Ministeriannit ataatsimeeqateqarnerata malitsigisaanik, Japanimilu Naalakkersuisunut ilaasortamit Nunatsinnut tikeraarnerit siullersaralugu.

Tikeraarnerup siunertaraa ministerinit attuumassuteqartunik naalakkersuinikkut qulequttanik oqaloqatigiissuteqarnissaq, kiisalu Kalaallit Nunaata pisortatigoortumik Japanimut december 2014-imi tikeraartoqarnissaanut piareersaataassalluni.

Ataasinngorneq 11. august Viceminister Tadahiko Ito-p Naalakkersuisut Siulittaasuat ataatsimeeqatigaa, tassani ilaatigut oqallisigineqarput niuernermi aalisarnermilu, ilinniartitaanermi ilisimatusarnermilu, kiisalu aatsitassarsiornermi aamma aatsitassanik suleqatigiinnerup annertusarneqarnissaat.

Viceminister Ito-p aamma Japanip piujuartitsilluni piorsaaneq illoqarfinnik ineriartortitsinermut pilersaarutai saqqummiuppai, tassani kissaatigalugu Kalaallit Nunaata ilaatigut silaannaap allanngoriartornerani, ataavartunik nukissiuutitigut aamma piujuartitsisumik pilersaarusiornermini misilittakkaminik tunniussaqarnissaa.

Nunatsinnut tikeraarnermi, Viceminister Ito-p aamma ataatsimeeqatigai Avatangiisinut Pinngortitamullu Naalakkersuisoq Kim Kielsen aamma Inuussutissarsiornermut Ataatsitassaqarnermullu Naalakkersuisunut ilaasortaq Jens-Erik Kirkegaard.

Ataatsimiinnerup kingorna Naalakkersuisunut Siulittaasoq Aleqa Hammond oqaaseqarpoq:

”Pingaartuuvoq japaniumiut kalaallillu tungaannit ataatsimoorussamik kissaateqartoqarnera tassalu Japanimit pitsaasumik suleqatigiinnerup itisilerneqarnissaa annertusarneqarnissaalu. Taamaattumik ullumikkut isumaqatigiissutigaarput, Naalakkersuisut aamma Japanimi naalakkersuisut decembarimi Nunatta Japanimi nittarsaassinerani naapeqatigeeqqissasut suleqatigiissinnaanikkut periarfissat malitseqartinniarlugit.

Oqartussaaffinnimi pingaaruteqartorpassuarni Japani aamma Kalaallit Nunaat suleqatigiimmata. Pingaartumik aalisar-nikkut aamma uuliasiornikkut qanimut suleqatigiittoqarsimavoq.

Ataatsimeeqatigiinnitsinni periarfissinneqarpugut oqartussaaffiit nutaat ilaannik oqaloqatigiissuteqarnissamut, tassani uanga pingaartinneruvara Nunatta Japanillu annertuumik ataatsimoorlutik qanoq iliuuseqarnerunissaat, pingaartumik attaveqarnermut aningaasaliissuteqarsinnaanerup aamma ataatsitassarsiornerup ineriartortinneqarnerata iluani, kisianni aamma ilisimatusarnikkut, ilinniartitaanikkut aamma kulturikkut paarlaasseqatigiittarnermi.

Pitsaasuuvoq, Japanimit soqutiginnittoqarnera Nunatsinni misilittagarisatsinnut ataavartumik nukissiuutitigut ineriartortitsinitsinni aamma piujuartitsilluta piorsaanermut pinngortitami pisuussutinik aqutsinitsinni."

Paasissutissat sukumiinerusut uunga attaveqarnikkut pissarsiarineqarsinnaapput:
Allan Olsen, Nunanut Allanut Pisortaqarfik, oqarasuaat: +299346410