EU-p killeqarfiata nakkutilliivia ullumi atoqqaartinneqarpoq

- Nunatsinni uumasut nakorsaqarfianni inuussutissalerinermik oqartussaaffimmut Naalakkersuisutut nuannaarutigivara EU-p nunatsinni killeqarfiata nakkutilliiveqarfia pisortatigoortumik atoqqaartinneqarneranut ullumi peqataasinnaagaama, Aalisarnermut, Piniarnermut Nunalerinermullu Naalakkersuisoq, Finn Karlsen atoqqaartitsinermi oqalugiarluni oqarpoq, nakkutilliiveqarfimmi Nuup umiarsualivianiittumi.

Danmarkimi inuussutissalerinermut ministeri Dan Jørgensen pisortatigoortumik atoqqaartitsinermi peqataavoq.

- Nuannaarutigaara Dan Jørgensen allallu maani atoqqaartitsinermi peqataasinnaammata, Finn Karlsen oqarpoq.

- Aaqqissuussineq nunatta nammineernerulernissaanut siuariarneruvoq, nunatsinnut EU-mullu uumasut peqqissusiannut upalungaarsimalersunut aamma ilaalertutut oqaatigineqarsinnaalluni, Finn Karlsen nunatta aalisakkanik EU-mik suleqateqarluni niueqatigilernerata pitsaaqutigiligai, tamatumalu nassatariligassai ilaatigut nassuiaassutigalugit pillugit oqarpoq.

- Aalisakkat tulaanneqartut peqqissaartumik, peqqissuunissamut aarlerinartoqannginnissaat qularnaarniarlugu misissoqqissaarneqartalerlutik, nunatsinni nunanilu tamalaani tunineqarsinnaalissapput, Aalisarnermut, Piniarnermut Nunalerinermullu Naalakkersuisoq erseqqissaavoq.

Aalisariutit nunanit EU-mut ilaasortaanngitsunit, soorlu Canadamiit Ruslandimiillu nunatsinnut, EU-mut pisaminnik tulaassisinnaalerput. Tulaanneqaannartut tikiunneqaannartut killeqarfiup nakkutilliiviani misissorneqarsinnaalerlutik.

- Illoqarfinni nakkutilliiveqartuni nakkutilliisut amerlineqarnissaannik periarfissaqalissaaq, illoqarfinnilu pineqartuni sulisut nakkutilliivinnut attuumassuteqartut aamma amerlisinnaallutik, Finn Karlsen erseqqissaavoq.

Nunat allat

Nunatsinni aalisakkanik suliffissuit aalisakkanik EU-mut eqqussisinnaalernerminnut tunisisinnaalernerminnullu periarfissaqalissapput.

- Canadami aalisakkanik tunisassianik nakkutilliisut nunatsinni nakkutilleeriaaserput soqutigisorujussuuaat. Canadami nakkutilliisut Nuummi nakkutilliivik takusareersimalerlugu, Finn Karlsen oqarpoq.

- Aalisariutit nunanit EU-mut ilaasortaanngitsunit nunatsinni nakkutilliivik atussallugu periarfissaqarput, taamaalillutik pisaminnik tulaassisarnerminnik aningaasartuutigisartakkatik ikilisinnaalissavaat, Naalakkersuini ilaasortaq oqarpoq.

- Oqartussaasutut suleqatigiilluarnissaq aamma killeqarfittut nakkutilliiviup iluatsilluarumaarnissaanik kissaateqarpunga.

Attavigineqarsinnaasoq: Ludvig Siegstad. E-mail: lusi@nanoq.gl