Upernavimmut nunaqarfiinullu angalaneq iluatsilluartoq

Naalakkersuisunut ilaasortat pingasut Kullorsuarmut, Tasiusamut, Aappilattumut, Innaarsunnut, Upernavik Kujallermut, Kangersuatsiamut aamma Upernavimmut augustip 2-nit augustip 5-t ilanngullugu angalaqqammersut Upernavimmiunit soqutigineqarlutik tikilluaqqusaasimapput.

Naalakkersuisut Upernaviup eqqaani sumiiffinnut tamanut tikikkaangata nunaqarfimmiut tikilluaqqusisaqaat. Nunaqarfimmiut inuuniarnikkut atukkatit pillugit oqariartuuteqartarput, soorlu avatangiisinut tunngasunik, atuartitaanikkut, inuussutissarsiornikkut aamma isumaginninnikkut atukkatik pillugit takutitsillutillu oqariartuuteqartarlutik.

Naalakkersuisunut ilaasortat angalaqatigiit tassaasut Ilaqutariinnermut Inatsisinillu Atuutsitsinermut Naalakkersuisoq Martha Lund Olsen, Ilinniartitaanermut, Ilageeqarnermut, Kultureqarnermut Naligiissitaanermullu Naalakkersuisoq Nick Nielsen aamma Inuussutissarsiornermut Aatsitassanullu Naalakkersuisoq angalanerminnit paasisaqarluarput.

“Nunaqarfinni tikitatsinni inuussutissarsiornikkut ineriartortitsinissamut periarfissat takuakka, soorlu aalisarnerup iluani inuussutissarsiornermi, suliffissat tassani ineriartortinneqarsinnaasut aamma sulisoqarnikkut. Inuussutissarsiornikkullu ineriartortitsiniarnermi unammillernartoq tassaavoq sumiiffiit isorartuumi inissisimammata, Inuussutissarsiornermut Aatsitassanullu Naalakkersuisoq Jens-Erik Kirkegaard oqarpoq.

“Upernavimmut angalanerput siorna Kommune Kujallermut angalanitsinnut assingusumik misigisaqarfiuvoq, ukiuni arlaqalersuni ulluinnarni inuuneq inunnik isumaginninnikkut aningaasakilliorfiupput. Aningaasakilliorneq malunnaartumik inunnik isumaginninnermut sunniisimavoq”, Ilaqutariinnermut Inatsisinillu Atuutsitsinermut Naalakkersuisoq Martha Lund Olsen oqarpoq.

Ilinniartitaanermut, Ilageeqarnermut, Kultureqarnermut Naligiissitaanermullu Naalakkersuisup akisussaaffeqarfiinut tunngasunik Upernavimmiut annertuumik uummammioqarput oqallinnerillu oqaluffimmut aamma inuusuttut ilinniartitaanerannut tunngalluinnartarlutik.

“Ataatsimiinnernilu najuuttut annertuumik naammaginngilaat oqaluffiup ilagiinnik sullissinera, kissaatigalugulu palasissaaleqineq piaarnerpaamik aaqqiiviginiarneqassasoq, aammalu minnerunngitsumik ajoqit pattattullu atugaasa aaqqiivigineqarnissaannik suliniuteqartoqarnissaa, Nick Nielsen oqarpoq nangillunilu “suliassarlu taanna aatsaat iluatissinnaavarput ilagiinni susassaqartut tamaasa qanimut ingerlaavartumillu oqalliseqatiginerisigut”.

Meeqqanut paaqqinniffissat amerlanerusut pitsaanerusullu tamani aamma kissaataasut ilagaat, soorluttaaq meeqqat atuarfianni atuartitsinerup pitsaasuunissaa atuartunullu angerlarsimaffiit – skolehjemmit – meeqqanik paaqqinnissinnaassusiat aamma annertuumik oqallisigineqartut.

“Amerlasuullu aamma ernummatigalugu oqaatigaat nunaqarfinni inuusuttuaqqat amerlanerusut inuussutissarsiutitsigut ilinniagaqarnissamut periarfissaqartariaqarnerat, minnerunngitsumik sungiusaammik suliffissaqartannginneq – praktikkerfissaqartannginneq – pissutigalugu nunaqarfimmiut inuusuttaat amerlasuut inuussutissarsiutinut ilinniakkamik aallartitsinissamut, aallartissimasullu naammassinninnissamut periarfissaqartanngimmata.”

Nick Nielsen oqarpoq nangillunilu,”Naalakkersuisut ilinniartitaanermi pilersaarutaat ilinniartitaanermilu periusissiaat Upernavimmi nunaqarfiinilu innuttaasut peqatigalugit oqallisigissallugu itisilissallugulu periarfissarissaarsimavunga. Pilersaarutimmi taakkua isumaga malillugu innuttaasut ernumassutigisaannut iliuusissatut naapertuulluartuupput, taamaattumillu qilanaaraara nunatsinni meerartatsinnut inuusuttuarartatsinnullu ilinniarnissamut neqeroorutitta pitsaassusiisigut qaffasinnerusunngortitsiniarnerput.”

Naalakkersuisut pingasut angalanerminni Upernavimmiunit aalisarnermut, avatangiisinut aamma ineqarnermut tunngasunik oqariartuuteqarfigineqartarput, taakkulu Naalakkersuisoqatigiit sinnerinut apuunneqassapput.

Ilulissani tamanut ataatsimiisitsinissaagaluaq ajoraluartumik taamaatiinnarneqartariaqarsimavoq angalaniarnikkut kinguaattoornerit pissutaallutik.

Inuussutissarsiutinut Aatsitassanullu Naalakkersuisoq Jens-Erik Kirkegaard annersumik oqaaseqartinneqassappat, attavissaq:
Naalakkersuisup allattaa, Kirsten Enequist: +299 34 56 04

Ilaqutariinnermut Inatsisinillu Atuutsitsinermut Naalakkersuisoq Martha Lund Olsen annerusumik oqaaseqartinneqassappat, attavissaq:
Naalakkersuisup allattaa Augusta Maria Jeremiassen: +299 53 93 71

Ilinniartitaanermut, Ilageeqarnermut, Kultureqarnermut Naligiissitaanermullu Naalakkersuisoq Nick Nielsen annerusumik oqaaseqartinniaraanni attavissaq
Ilinniartitaanermut nakkutilliisoq Kaali Olsen: +299 34 57 40