EU-p killeqarfiata nakkutilliisoqarfia marlunngorpat atoqqaartinneqassaaq

Danmarkimi inuussutissalerinermut ministeri Dan Jørgensenip Aalisarnermut, Piniarnermut Nunalerinermullu Naalakkersuisoq, Finn Karlsen, peqatigalugu EU-p killeqarfiata nakkutilliisoqarfia Nuummi umiarsualivimmiittoq, Royal Arctic Linep illutaaniittoq, pisortatigoortumik marlunngorpat aggustip aqqaneq aappaanni nalunaaqutaq 13.00 atoqqaartissavaat. Atoqqaartinneqartussaq taaguuteqartinneqarpoq: Border Inspection Post.

EU-p killeqarfiata nakkutilliisoqarfiata nunatsinni atoqqaartinneqarnera iluatsillugu nunatta EU-mik suleqateqarluni aalisakkanik nunanut allanut niueqateqalernera nalliussitinneqassaaq.

Canadamiut aalisariutaataat 15-it Nuummi pisatik juunip 22-anniilli maannamut usingiartarsimavaat.

Usingiaanermi Danmarkimi killeqarfimmi nakkutilliisoq inuussutissalerinermut qullersaqarfimmeersup killeqarfiup nakkutilliisoqarfiani siunissami nakkutilliisartussat uumasut nakorsaqarfianneersut, inuussutissalerinermik oqartussaaffimmeersut aamma Kalaallit Nunaanni Aalisarsinnaanermut Nakkutilliisoqarfimmeersut suleqatigalugit aalisakkanik tulaanneqartunik nakkutiginnipput, EU-mut nassiussassanik misissuillutik.

EU-p kommissionia apriilip tallimaanni 2014-mi nalunaaruteqarpoq aalisakkanit nioqqutissiat aalisariutinit nunanit allaneersunit, soorlu Canadameersunit Ruslandimeersunillu nunatsinnut tulaassaat, nunatsinni akuerisaasumik killeqarfittut nakkutilliivinni, Nuummi Sisimiuniluunniit siunissami nakkutilliisoqartalissasoq.

Allaaserisaq una Nunarput nammineerluni killeqarfimmik nakkutiginnilerpoq, una toorlugu atuarsinnaavat.

Attavigineqarsinnaavoq: Uumasunut nakorsaaneq, Asbjørn Brandt. E-mail: asbr@nanoq.gl Tlf. 345323