Qeqqussanik suliniutillit katersisinnaatitaapput

Aalisarnermut Piniarnermut Nunalerinermullu Naalakkersuisoqarfiup nunatsinni suliniutit pingasut qeqqussanik ukioq manna misiligutaasumik katersisinnaanissaannut akuersissutigai.

Naalakkersuisoqarfimmit ilisimatitsissutigineqarpoq akuersissuteqarnermi suliffissanik ataavartunik pilersitsinissaq pingaartinneqartoq, inatsisitigullu nalunaarutit pisariaqartut piffissami aggersumi suliarineqarnissaat pilersaarutaalluni.

Akuersissuteqarnermi immap naasuisa nungukkiartunnginnissaat aamma pingaartinneqarluni.

Immap naasui pillugit suliniutit nunalerineq pillugu inatsimmi allassimapput.

Akuersissutaagallartumik pineqartuni immap naasuinik katersisinnaaneq taamaallaat pineqarpoq, kingusinnerusukkullu tunisassiorsinnaanissaq nunatsinniillu tunisassianik annissuisinnaanissaq immikkut qinnutigineqassalluni.

Attavigineqarsinnaasoq: Aalisarnermut, Piniarnermut Nunalerinermullu Naalakkersuisoqarfimmi immikkoortortaqarfimmi pisortaq Amalie Jessen. E-mail: amalie@nanoq.gl