Avaleraasartooqassuseq misissuiffigineqalerpoq

Islandimiut aalisakkanik misissuutaat Arni Fridriksson Tunumi avaleraasartooqassuseq ulluni makkunani misissuiffigileruttorpaa.

Atlantikup avannarpasissuani ataqatigiissaakkamik pinngortitamik misissuinertut ilaavoq, soorlu aamma Islandimi, Savalimmiuni Norgimilu misissuisoqartoq.

Nunap isuata avataanit Tasiilap avataa angullugu misissuissaaq.

Paasissutissat, aamma aalisarnermit paasissutissat katersaasartut ilanngullugit, biologit ukioq manna kingusinnerusukkut nalilersueqqinnissaanni atorneqassapput. Paasissutissat tamakku nunatta qanoq amerlatigisunik avaleraasartuunik Atlantikup avannaaneersunik pisassinneqarsinnaaneranik aalajangersaanerni aalajangiisuulluinnartussaassapput.

Nunatta imartaata kissatsinnerunera pissutaalluni ukiuni makkunani avaleraasartoorpassuit Atlantikup avannaata imartani ilaatigut 3.000 kilometerit qaangerlugit ungasinnerusuneersut takkussuullutik imartatsinniilersimapput.

Atlantikup avannaani tamarmi avaleraasartooqassuseq ilisimatuussutsikkut suleqatigiiffimmit ICES-imit qanittukkut naliliiffigineqarmat peqassuseq patajaatsumik inissisimasutut nalilerneqarpoq.

Atlantikup avannaa tamakkerlugu 2014-imut avaleraasartoortassiissutigineqarsinnaasutut biologinit innersuussutigineqarput 927.000 tonsit 1.011.000 tonsillu akornanniittut.

Taamaalilluni nunatta misileraatitut 2014-imut avaleraasartoortassiissutigisai 100.000 tonsiusut Atlantikup avannaani pisat tamakkiisut 7 procenteriumaassagaat naatsorsuutigineqarpoq.

- Misissuinerit inerneri atuassallugit pissanganartorujussuuvoq. Tunummi imartaa annertoorujussuaq ukioq manna misissuiffiginiarneqarpoq, siornatigut misissuisarnernit annerujussuarmik misissuisoqartussaalluni, Finn Karlsen Aalisarnermut, Piniarnermut Nunalerinermullu Naalakkersuisoq Tunumi avaleraasartooqassutsip misissuiffigineqarnissaanut 2 million koruuninik Naalakkersuisunut Aningaasaqarnermullu ataatsimiitsitaliamut marsimi qinnuteqarnermini ilaatigut oqarpoq.

Aalisartitseqatigiiffiit nunatsinneersut Tunup imartaani avaleraasartuunik 53.000 tonsinik 2013-imi pisaqarput, nunarpullu misileraalluni Atlantikup avannaaneersunik avaleraasartoorniarnissanut 100.000 tonsinik 2014-imut pisassiissuteqarpoq.