Misileraalluni qaleralittassat tamakkinngilaat


Qeqertarsuup Tunuani umiatsiaararsortut 370-it ilaasa misileraalluni qaleralittassiissutigineqartunit 250 tonsinit 207 tonsit juulimi aalisarsimavaat.

Naalakkersuisut juulip 14-ianni akuersissutigaat Qeqertarsuup Tunuani sumiiffinni aalajangersimasuni misileraalluni qaleralinniartoqarsinnaasoq, tamaani qaleralittassiissutit juuli aallartilaaginnartoq nungummata.

Misileraalluni juulimut qaleralittassiissutigineqartut 250 tonsiupput aggustimilu 250 tonsit aamma pisassiissutigineqarlutik.

Misileraalluni aalisarneq umiatsiaararsortunit aqutsiveqarfimmi Qeqertarsuup Tunuani, Uummannami Upernavimmilu aalisarsinnaanermut akuersissutilinnit peqataaffigineqarsinnaavoq, taakkuli Ilulissani, Qeqertarsuarmi, Qasigiannguani, Aasianni Kangaatsiamilu najugaqartuussapput.

293 tonsit sinnerupput

Aqutsiveqarfik Qeqertarsuup Tunuani umiatsiaararsortut qalerallit 63 tonsit qaammatip aallartinneranit aggustip sisamaannut aalisarsimavaat. Qaammammut pisassiissutigineqartut 421 tonsiupput. Sinnerullutik 293 tonsit.

Attavigineqarsinnaavoq: Aalisarnermut, Piniarnermut Nunalerinermullu Naalakkersuisoqarfimmi immikkoortortaqarfimmi pisortaq. E-mail: emanuel@nanoq.gl