Tamanik inissaqartitsineq ilinniarnermut matuersaataavoq

Naalakkersuisunut ilaasortap Nick Nielsenip meeqqat illersuisuata Aaja Chemnitz Larsenip annertunerusumik qaffasinnerusumillu ilinniagaqarnissap pingaarutaanik qitiutitsilluni oqallinnermut peqataanera nuannaarutigaa.

Tamatumunnga atatillugu Nick Nielsen oqaaseqarpoq:

“Meeqqat illersuisuata isumaa tamakkiisumik ilalerpara, uagut inersimasutut meerartatsinnut naleqqiullugu pingaarutilimmik inissisimanerput isiginiarmagu. Meerartatsinnut maligassiuisuussaagut, qularnaassavarpullu meeqqat amerlanerujussuit toqqissisimasumik peroriartornissaat, taamatullu inuttut ilinniakkatigullu ilinniagaqalernissaminnut tunuliaqutaqarluarnissaat. Taamaammat aamma meeqqat atuarfiannik arlaannaannulluunniit attuumanngitsumik naliliinerup, Naalakkersuisut Kanukoka Imak-kilu suleqatigalugit ingerlassaata, inernilerneqarnissaa qilanaaraarput. Neriuutigilluinnarpara naliliineq meeqqat atuarfiat pillugu oqallinnermut pingaarutilimmik tapertaassasoq, taamatullu meeqqatut inuunerissuuneq pillugu; soqutiginnitunillu tamanik tamanna pillugu oqalliseqateqarnissara qilanaarivara – isumaqarpunga meeqqat atuarfiata pitsaanerulernissaanut atuarfiup angajoqqaallu suleqatigiinnerunissaat pisariaqartoq, tamatumanilu meeqqat atuarfiata arlaannaannulluunniit attuumanngitsumik nalilerneqarnera ilisimasanik isumassarsianillu pitsaasunik tunniussaqarsinnaavoq, meeqqallu atuarfiat tamanik inissaqartitsiffiusoq qularnaarlugu”.

Meeqqat illersuisuata aammattaaq oqaatigaa immaqa ilinniagaqarnissaq pisinnaatitaaffittut isigiunnaarlugu pisussaaffittut isigisariaqaraluartoq.

Nick Nielsenip taamatut isumaqarnerup tunuliaqutarisai akuersaarpai, kisiannili tamanik inissaqartitsineq ilinniagaqassutsip qaffassarnissaani politikikkut anguniagassatut aallaavigiumallugu.

Nick Nielsenip taama isumaqarnini itisilerpaa:

“Nammineq kajumissuseq tassaasariaqarpoq tunngaviusoq. Uagut inersimasutut inuiaqatigiittullu meeqqat amerlanerusut toqqissisimasumik peroriartortissinnaagutsigut, amerlanerusut meeqqat atuarfianni iluatsitsisutut misiginissaannut tunngaviliisinnaagutta inuiaqatigiinnillu pingaartinneqarlutik ilaasutut misigitillugit, qularinngilara tamanna inuusuttut ilinniagaannut ingerlaqqiffiusumillu ilinniakkanut sunniuteqarluassasoq. Taamaammat Naalakkersuisuni inuutissarsiutinik ilinniartitsinerit nutarternissaat sulissutigiuarparput, amerlanerit ilinniagaqalersinnaaqqullugit, sungiusarlunilu suliffissat pitsaanerusumik ilusilersorneqaqqullugit. Tamatigullumi inuutissarsiutinik ilinniartitsinerit, ingerlaqqiffiusumik ilinniakkat ilinniartunullu inissiat annertusaavigineqarnissaat pisariaqarpoq, meeqqat atuarfiata kingorna ilinniaqqiffiit aammattaaq tamanik inissaqartitsilissappata."

Naggasiullugu Nick Nielsenip eqikkaalluni oqaatigaa meeqqat illersuisuannik suleqateqarluartuarnissani qilanaaralugu, oqaatigalugulu meeqqat illersuisuata arlaannaannulluunniit attuumanngitsumik meeqqat sinnerlugit nakkutilliisuunera pingaartilluinnarlugu:

“Qularinngilluinnarpara meeqqat illersuisuat meerartavut meeqqallu atuarfiat pillugit oqallinnerup ingerlateqqinnerani pingaarutilinnik tunniussaqartarumaartoq. Meeqqallu atuarfiannik arlaannaannulluunniit attuumanngitsumik naliliinerup inerneri pillugit meeqqat illersuisuannik allanillumi oqaloqateqarnissara qilanaarivara”.

Paasissutissat annertunerusut pissarsiariniarukkit attaveqarfigiuk:

Naalakkersuisoq Nick Nielsen, Daniel Gottrup aqqutigalugu, tlf.: + 299 34 50 00