Kapisilinniarneq aggustip aallaqqaataani aallartissaaq

Kapisillit fabrikkinut tunineqartartut 35 tonsiusut 30 tonsinngortinneqarput. Kapisilinniarneq tallimanngorpat, aggustip aallaqqaatani aallartissaaq oktobarip 31-anni unitsinneqassalluni.

Inuussutissarsiutigalugu aalisartut namminneq pisaminnik aalisarsinnaapput kalaalimineerniarfinnut, napparsimavinnut, neriniartarfinnut allanullu tuniniaasinnaallutik.

Kapisillit nunatsinni tuniniarneqarsinnaapput, nunanut allanut tuniniarneqarsinnaanatik.

Namminersorlutik Oqartussat kapisilinniartarneq pillugu nalunaarutaat nr. 12 aggustip aallaqqaataani 2012-meersoq naapertorlugu innuttaasut tamarmik kapisilinniarsinnaatipput, inuussutissarsiutigalugu aalisartut sunngiffimminilu aalisartut.

Inuussutissarsiutigalugu aalisartut akuersissuteqassapput, sunngiffimminni aalisartut akuersissuteqaratik. Kapisilittulli tamarmik pisatik Kalaallit Nunaanni Aalisarsinnaanermut Nakkutilliisoqarfimmut nalunaarutigissavaat.

Fabrikkinut tunineqarsinnaasut

Kapisillit fabrikkinut 2012-mi tunineqarsinnaasutut Naalakkersuisut aalajangerpaat, 2012-mi 2013-milu 35 tonsit tunineqarsinnaallutik.

Naalakkersuisut ukiuni kingullerni tunineqartartut nalilersoreerlugit, nunaniillu allanit NASCO-kukkut uparuartuisarnerit tunngavigalugit, Naalakkersuisut kapisillit fabrikkinut tunineqartartut 30 tonsinut ikilisissallugit aalajangerpaat.

Attavigineqarsinnaavoq: Aalisarnermut, Piniarnermut Nunalerinermullu Naalakkersuisoqarfimmi immikkoortortaqarfimmi pisortaq. E-mail: emanuel@nanoq.gl