Eqqaamajuk qimmivit imertittarnissaat

Aasartorsuuvoq. Taamaalinerani qilalertaqigatta imertuarnissarput pisariaqartittarparput, aamma qimmit qimuttut tamanna pisariaqartittaqaat.

- Taamaattumik qimmit qilalertikkumanagit uppitinneqarsinnaanngitsunik aasaanerani imertarfeqartarnissaat pingaaruteqartorujussuuvoq, soorlu aamma imerfigisinnaasaannut qanittumiinnissaat pingaaruteqartorujussuusoq, uumasut nakorsaat, Sanne Eline Wennerberg, Ilulissat, oqarpoq.

Uumasut nakorsaata Sanne Eline Wennerbergip Ilulissani politiit Qaasuitsullu kommuniat suleqatigalugit qimmit inuttaminnit paarinerlunneqartut 19-it sapaatip akunnerini kingullerni marlunni toquttariaqarsimavaat.

- Qimmit ulloq ataaseq imerterneqannginnertik toqqutiginavianngilaat, qilalertinneqarneralli naalliutsitsinertut oqaatigineqarsinnaavoq. Soorlumi uagut ullormi ataatsimi iminngitsooraangatta qilalertaqisugut, uumasut nakorsaat oqarpoq.

Qimmit kiagunneq ajoramik kiak timaanniittoq aalannguulluni silaannannguuttarpoq.

Timi nukillaartarpoq

Qimmip timaata oqimaassusiata 60 procentia imiuvoq. Imeq timimi pingaarutipilussuuvoq.

Timi imermik tamakkiisumik pitinnani suliunnaartarpoq.

Akiuussutissaaruttarpoq nerisassat arrortikkuminaatilersarpai, nukillaangalersarluni malugissuseeruttarlunilu. Imermik amigaateqalerneq ilisimajunnaarnermik toqumillu kinguneqarsinnaasarpoq.

- Taamaattumik qimmit oqqatik anillallugit aattangaannartarput. Nunatta silaannaa paneqimmat kiatsillugu qimmit anersaartornerminni imermik annaasaqartorujussuusarput, aalannguuttarami. Taamaatsillugu qilalertorujussuanngortarlutik, Sanne Eline Wennerberg oqaluttuarpoq.

Qeqertat qimmeqarfiusut

Nunatsinni takornartaanngilaq qimmit tatsit eqqaanni pitunneqartarmata, namminneerlutik imerniassammata. Uumasut nakorsaata erseqqissarpaa qimmit tatsit eqqaanniikkaluartulluunniit inuttaata ullut tamaasa takusartussaammagit.

- Qimmimut ilungersunalersitsisumik pisoqarsinnaasarpoq, taseq angusinnaajunnaarluni pisoqaraangat, soorlu pituutaat ilagulluni nermuttoorluni, Sanne Eline Wennerberg oqarpoq.

Qeqertani kommunip akuerisaani qimmilisoqarsinnaavoq.

Sanne Eline Wennerberg oqarpoq qeqertaq qimmiliffiusoq taseqartariaqartoq, imaq qimminut imeritissallugu pitsaanngimmat, tarajoqarmat qilalertitsiinnartarmallu.

– Qeqertami qimmilisup pisussaaffigivaa qimmini ikinnerpaamik ullut tamaasa ataasiarlugit takusartassallugit, uumasut nakorsaat erseqqissaavoq.

Attavigineqarsinnaavoq: Uumasut nakorsaat Sanne Eline Wennerberg. E-mail: uumasut@nanoq.gl. Tel.: +299 345000