Namminersorlutik Oqartussat Arctic Green Food A/S-ip pisortaasa taarsiissuteqarnissaat pillugu

Namminersorlutik Oqartussat isumaliuutigereerlugu aalajangerput eqqartuussivikkut pisortaq Charles Kastberg Christensen 4.900.000 koruuninik taarsiinissaanik piumasaqarfigissallugu.

Namminersorlutik Oqartussat Arctic Green Food A/S-imut 4.900.000 koruuninik januaarimi 2013-mi akiliuteqarnerat taarsiinissamut piumasaqarnermut tunngaviuvoq.

Ingerlatsiviup 2013-mi akiliutissaanut Namminersorlutik Oqartussat siumoortumik akiliuteqarput.

Akiliutigineqartut nunatsinni aalisartut piniartullu sumiiffimminni tunisisinnaanissaannut qulakkeerutaallutik.

Ingerlatsivilli februaarimi 2013-mi akiliisinnaajunnaarpoq. Namminersorlutik Oqartussanit akiliutigineqartut piffissami tamatumani atorneqareersimapput aalisartunut piniartunullu suli akiliisoqanngitsoq.

Arctic Green Food A/S-ip akiliisinnaajunnaarnermini pigisaasa suliarineqarneri naammassineqareerput.

Namminersorlutik Oqartussat qularinngilluinnarpaat ingerlatsivimmut akiliutigineqarsimasut atorneqarnerilu ingerlatsiviup qularnaatsumik ilisimassagaa 2013-mut kiffartuussinermut isumaqatigiissummi piumasarineqartut naammassinaviarnagit - soorlu siumoortumik akiliuteqarnermi tunngavigineqartut.

Namminersorlutik Oqartussat isumaqarput ingerlatsiviup kiffartuussinermut isumaqatigiissut naammassiniarlugu iliuuserisimasai arlaqaqisut isornartuusut, soorlu ingerlatsiviup katitigaasimanera, tamatumani ingerlatsiviup aningaasartuutigisimasai paasiuminaassimaqalutik.

Kiffartuussinermut isumaqatigiissummi tunitsiviit arlallit ingerlanneqarneri aamma ilaapput, tunitsiviit isumaqatigiissutip atuunnerani sivikitsuinnarmik sivisunerusumilluunniit tunitsivigineqartarsimanatik.

Namminersorlutik Oqartussanit Charles Kastberg Christensenimiit taarsiivigineqarnissamik piumasaqaataasoq tassaavoq 2013-mut siumoortumik akiliutigineqartut kisiisa pineqarnerat, taakkulu atorneqarsimaneri pillugit.

Eqqartuussivikkut piumasaqaateqarnissaq isumaliuutigineqalermat Namminersorlutik Oqartussanit tunngaviusumik kissaatigineqartorujussuusimavoq kiffartuussinermut isumaqatigiissutigineqartoq qulaajaavigineqassasoq.

Tamannalu tunngavigalugu, 2013-mut siumoortumik akiliutigineqarsimasut kisiisa pillugit eqqartuussivilerisitsisoqassaaq.

Eqqartuussivimmi nassuiaassutigineqassaaq erseqqissaassutigineqassallunilu Arctic Green Food A/S-ip akiliisinnaajunnaariartornera, siumoortumillu akiliutigineqarsimasut atorneqarneri immikkut sammineqassallutik.

Eqqartuussissutigut uppernarsaaterpassuit tunngaviginngikkaluarlugit sammineqassalluni.

Namminersorlutik Oqartussat isumaqarput pisortaq Charles Kastberg Christensen, siumoortumik akiliutigineqartut nalaanni, ingerlatsiviup pisortaasa ilaattut nalunaarsimanngikkaluartoq, akiliutigineqartut atorneqarneri tamaasa aalajangiiffigisarsimagai.

Taamaattumik Charles Kastberg Christensen taarsiisussanngortillugu piumaffigineqassaaq.

Namminersorlutik Oqartussat suliap suliarineqarnissaa nunatsinni tamanut saqqummiussassanngorlugu kissaatigimmassuk, suliap nunatsinni suliarineqarnissaa kissaatigaat.

Attavigineqarsinnaavoq: Aalisarnermut, Piniarnermut Nunalerinermullu Naalakkersuisoqarfimmi immikkoortortaqarfimmi pisortaq. E-mail: emanuel@nanoq.gl