Aleqa Hammond: Misilittakkavut ilinniarfigisariaqarpavut

Leona Aglukkaq, Issittumi Siunnersuisoqatigiinni aamma siulittaasuusoq, juulip 21-anni 2014-imi ataatsimeeqatigaa.

Ataatsimiinnermi oqaluuserineqarput Issittumi SIunnersuisoqatigiinni suleqatigiinneq, Kalaallit Nunaanni Canadallu issittortaani isumaginninnikkut peqqinnissakkullu ajornartorsiutinik suliaqarneq pillugu misilittakkanik tunioraateqatigiinneq, sulisartut Kalaallit Nunaata Canadallu akornanni nuuttartut amerliartortinnissaannut qulakkeerinninnissaq, aamma puisit amiinik Europami tunisassiorsinnaanerup qulakkeerneqarnissaanut suliniarnerup ataqatigiissarneqarnera.

Ataatsimeereernermi Aleqa Hammond ima oqarpoq:

”Issittumi Siunnersuisoqatigiinni Canadamit 2015-ip tungaanut siulittaasuuffigineqartumi Issittumi nunat akornanni inuussutissarsiornikkut suleqatigiissinnaanerup periarfissarsiorneqarnerunissaa pingaartinneqarpoq. Tamanna Kalaallit Nunaannit Canadamillu ataatsimoorlutik aamma pingaartinneqarluarniarpoq.

Isumaginninnerup peqqinnissallu iluani misilittakkatsinnik ilinniarfiginissarput pingaaruteqarpoq, amerlasoorpassuartigummi assingusunik ajornartorsiuteqarpugut. Pingaaruteqarpoq Inuit akornanni qinikkat sassarternissaat ammasumillu misilittakkanik tunioraateqatigiillutik. Qinikkat siullinngortariaqarput paquminartut oqaluuseriuminaatsut paquminarunnaarsinniarlugit. Ammasumik aatsaat oqaluuserilerutsigit, aamma isumaginninnikkut ajornartorsiutit oqimaatsut pillugit, ajornartorsiut kaaviiaaginnerlutut ittoq qaangeriartulissavarput.

Sulisartut Canadap Kalaallit Nunaatalu akornanni nuuttartut amerlisarnissaasa qulakkeerniarnissaat ataatsimoorluta misissornissaa isumaqatigiissutigaarput. Tamanna pingaaruteqarpoq tassami Canadami pisariaqartunik misilittagalinnik, pingaartumik aatsitassarsiornermi uuliasiornermilu, inoqarpoq Kalaallit Nunaannut iluaqutaasinnaasunik.

EU-p puisit amiinik eqqusseqqusinnginnera oqaloqatigiinnermi aamma inituvoq. Inuit eqqussisinnaatinneqarnerisa atorluarneqarnerunissaa pingaaruteqarpoq, taamaalilluni aaqqiineq Canadami Kalaallit Nunaannilu inunnit iluaqutaasinnaaqqullugu. EU-mut suliniarnermi ataqatigiissaarinissaq Canadamit Kalaallit Nunaanniillu sulissutiginiarneqarpoq, puisit amiinik avammut tunisassiornitta pingaaruteqassusaa EU-mit paasineqarsinnaaqqullugu.”

Naalakkersuisut Siulittaasuat Aleqa Hammond aamma Ilaqutariinnermut Inarsisinillu Atortitsinermut Naalakkersuisoq Martha Lund Olsen ICC-p ulluni 20-24. juuli 2014 aqqaneq aappassaanik ataatsimeersuarnerani peqataapput, taamaalilluni Leona Aglukkarlu naapeqatigiinneq pisinnaalersimalluni.

Naalakkersuisut Siulittaasuat aamma Ilaqutariinnermut Inatsisinillu Atortitsinermut Naalakkersuisoq ataatsimeersuarnermi saqqummiussipput.

ICC-p ataatsimeersuarnerani Kalaallit Nunaata juulip 23-anni ilassinninnerani Naalakkersuisut qaaqqusisuupput.

Aleqa Hammondip ICC-p ataatsimeersuarnerani oqalugiaataa uani atuarsinnaavat. 

 

Paasisaqarnerorusuttut saaffigisinnaavaat Kai Holst Andersen, Nunanut Allanut Pisortaqarfimmi pisortaq, oqarasuaammut angallattakkamut +299 55 33 31.