Misileraalluni 38 tonsit qaleralittarineqarput

Qeqertarsuup Tunuani umiatsiaararsorlutik qaleralinniartartut 370-it ilaasa qalerallit, Qeqertarsuup Tunuata kangimut sineriaata avasissuani 38 tonsit sapaatip akunnerani kingullermi aalisarpaat.

Naalakkersuisut juulip 14-ianni akuersissutigaat Qeqertarsuup Tunuani sumiiffinni aalajangersimasuni misileraalluni qaleralinniartoqarsinnaasoq, tamaani qaleralittassiissutit juuli aallartilaaginnartoq nungummata.

Misileraalluni juulimut qaleralittassiissutigineqartut 250 tonsiupput aggustimilu 250 tonsit aamma pisassiissutigineqarlutik.

Misileraalluni aalisarneq umiatsiaararsortunit aqutsiveqarfimmi Qeqertarsuup Tunuani, Uummannami Upernavimmilu aalisarsinnaanermut akuersissutilinnit peqataaffigineqarsinnaavoq, taakkuli Ilulissani, Qeqertarsuarmi, Qasigiannguani, Aasianni Kangaatsiamilu najugaqartuussapput.

Aqutsiveqarfimmi Qeqertarsuup Tunuani umiatsiaararsortut aalisarfiulluarnerani qalerallit sapaatip akunneranut 200 tonsit missaanniittut aalisarsinnaasarpaat.

Attavigineqarsinnaavoq: Aalisarnermut, Piniarnermut Nunalerinermullu Naalakkersuisoqarfimmi immikkoortortaqarfimmi pisortaq. E-mail: emanuel@nanoq.gl