Marthap paquminartut paquminarunnaarsinniarpai

ICCp aqqaneq marlussaanik ataatsimeersuarneranut peqataanerup paqumigalugit eqqartorumaneqanngitsut ammaappai.

Naalakkersuisoq Martha Lund Olsen ICC-p aqqaneq marlussaani ataatsimeersuarnerani Inuvikmi Canadami peqataaffigaa. Martha Lund Olsen julip 22-ni panelemi nunat ICC’p ilaasortaaffigisaaneersunit saqqummeeqateqarpoq tassaasut Chukotka, Alaska Canadalu qulequtaralugu ”Inuiaqatigiit peqqissut Ilaqutariit ilorrisimaartut”.

Martha Lund Olsen nunani issittuni najugallit ajornartorsiutisartagaasa assingi saqqummiuppai tassaasut kinguaassiuutitigut atornerluinerit, kinguaassiuutitigut atornerlunneqarsimasut kingunerlutsitsisarneri, persuttaasarnerup akiorniarneqarneranut suliniutit, persuttaasarnerit, imminortarneq ilaqutariinnullu sullissiviit. Meeqqat kinguaassiuutitigut atorneqarlunneqartartut nipangiutiinnarneqartarnerat ICC-imi saqqummiunneqarnerata kingunerissavaa ammasumik eqqartueqatigiissinnaanngorneq, saqqummiinerlu ataatsimeeqataasunik tigulluarneqarpoq.

”Nuannaarutigeqaara nunani issittormioqatitsinnut Nunatsinni isumaginninnikkut ajornartorsiutivut ilaqutariinnilu ajornartorsiutit pillugit saqqummisinnaagama. Issittumi najugaqartuusugut inuiaqatigiit eqqarsaatigalugit assigiinnik ajornartorsiuteqarpugut soorlu persuttaasarnerit, kinguaassiuutitigut atornerluisarnerit, imminortarnerit, sumiginnaanerit inuillu misigisapiluminnik kingunerlutsitsisartut il.il. eqqarsaatigalugit. Immitsinnut saqqummeeqaatigiiffiginerput nunat issittumiittut akimorlugit iluaqutigissagigut qularutiginngilara. Sullissinitsinni tamatta immikkut periusissiaqarpugut assigiinngitsunillu sullisseriaaseqarluta, suleqatigiissutissaqarutta suleqatigiissaagut” ataatsimiinneq pillugu taama oqarpoq Martha Lund Olsen.